National Institute of Technology (NIT) Mizoram Board of Governors chuan nimin tlai khan Chief minister Pu Lal Thanhawla chu a bangalow ah hmuin inkawmna hun tha tak an nei.

NIT Mizoram Board of Governors member te hi Chief Minister Pu Lal Thanhawla rawtna zulzuia meeting hmasa ber Mizoram ngeia neih tura atih chu rawn hmang tura nimin  chhuna Aizawl lo thleng an ni a. NIT Mizoram hi central sorkar thuneihna pumhlum hnuaia awm niin, Board of Governors a member 8 leh special invitees 2 awmna hi Union Ministry of Human Resources Development ina a ruatte an ni. Zirna bul tanna hmasa ber 1st Batch chu Nagpur ah tan alo ni tawh a, kumin 2011 July - August thla bawr vel khian session thar tan tur a ni a. Hemi atana tul pawimawh tam tak bakah campus  nghet an neihna hmun turte sawiho turin Higher & Technical Education department conference roomah meeting an nei zui nghal bawk a  Board member te hian Pu Lalsawta, Minister for H&TE etc pawh an hmu bawk a ni.

Board of Governors member te hi an Chairman K.Ravi Kumar tih loh an lo kal kim vek a. Chungte chu Prof. T.S. Sampath Kumar, IIT, Madras; Mr. V.R.Jamdar, Member; Prof. A.G. Despande, VNIT, Nagpur; Prof. D.J. Katyayan,VNIT, Nagpur;  Dr. H. T. Thorat,VNIT, Nagpur;  Dr.V.M.Gamveer, VNIT, Nagpur leh Pi Esther Lal Ruatkimi, Secretary to Govt. of Mizoram, H&TE etc. te an ni a. An ni bakah hian Special Invitees Dr. H. L. Malsawma, Director, H&TE leh Daniel Hauhnar, OSD, NIT, Mizoram te an ni.