892/2022-2023
Aizawl, the 14th June 2022: A hnuai tarlan ang hian Pu Lalsawma, Jt.Director (F&D), Controlling & Licensing Authority, Directorate of Health Services chuan Cancer Damdawi hmuhchhuah thar a awm niawm taka thu thang chungchangah mipuite hriattur thuchhuah a siam.

"Tunlaiin Mizoramah cancer damdawi chikhat 'DOSTARLIMAB' chu mithiamten tai (rectum) cancer atan a tha a ni tih an zirchianna England Journal of Medicine-a June ni 5, 2022-a an chhuah, an thuziak thenkhat Mizo tawnga lehlin, Facebook leh Whatsapp Group hrang hranga thawndarh a nasa hle tih hriat a ni a.

Dostarlimab hi cancer damdawi atana hman reng tawh thin a ni a, Medical Oncologist-te hriatpuina nen chauhva fimkhur taka hman ngai damdawi a ni. Damdawi dang ang bawkin a hman tangkai theihna dang an dapna lamah zirtuten rectal cancer enkawl nan a tha tih an hmuh belh a ni a, a lawmawm hle a ni. Damlote tan hman theiha chhawpchhuah a la ni thuai ang tih beisei ila.

Amaherawhchu, hetianga thuziak lo vawrhdarha lo buaipui chiam hi damlote rilru tihchiai theihna a nih avangin tih loh atan a tha hle a ni. Damdawi lama hmalatuten a hunah chuan hma an la mai dawn a, chutih laia cancer natna vei mekte hman mai theih tur ang hrima a zuar rawngkaia hma lo lak phei chu dan kalh tlat a ni a, tih hauh loh tur tih i hre tlang ang u."