893/2022-2023
Aizawl, the 14th June 2022: Vawiin khan Aijal Club-a World Blood Donor’s Day a hmanpuinaah Health Minister Dr R.Lalthangliana chuan Mizoram State Health Care Scheme ba rulhna tur sum Sawrkai Laipuiin a pawmpui thu a sawi.

Dr R.Lalthangliana chuan Mizoram State Health Care Scheme chu Mizoram mipui a tam thei ang berin an chhawr tangkai theih nan sawrkarin ruahmanna a siam a, amaherawhchu, budget-a ruahman lawk hauh loh khuarel chhiatna hrang hrang - hripui leng, lir nghing, vawk hri leh Myanmar raltlante tuamhlawmna thlenga sawrkar sum tam tak a luanral tak avangin sum lamah sawrkar a pachhe hle a; Health Care ba tam tak a inkhawl hman tawh tih a sawi a. Health Care pawisa petu Finance Department lamin harsatna an tawk a, a rulhna turin Asian Development Bank ah soft loan cheng vaibelchhe sangkhat dil niin hei hi Central Sawrkar rulhpui tura dil a nih thu Health Minister chuan a sawi. Hetih lai hian Sawrkar Laipuiin sum lama harsatna a tawh ve mek bawk avangin Ministry of Finance hnuaia Department of Expenditure chuan State sawrkarin rul mai se tih rawtna a siam a. Mizoram Sawrkar hotuluten vawi tam tak Sawrkar Laipui thuneitute an dawr hnuah nizan khan Finance Ministry Screening Committee chuan Mizoram atanga rawtna an thlen chu an pawmpui tak thu an rawn hrilh tih Dr R.Lalthangliana chuan a sawi a ni.

World Blood Donor’s Day hmanpuitu Dr R.Lalthangliana chuan mihring dam chhung tawi te ah midangte tana inpekna tluka hlu leh ropui a awm lo, a ti a. Pathianin Mizote thinlungah mahni mihringpuite hmangaihna, mi dangte lainatna leh duhsakna a dah a, chumi lanchhuahna pawimawh ber te zinga mi chu mamawhtute tana a thlawna thisen pek voluntary blood donation hi a ni, a ti. Health Minister chuan mahni tana hlawkna um lova damlo mangangte tana an din tlat avangin a thlawna thisen petute a fak a. Association for Voluntary Blood Donation (ABVD) te hmalakna ropui a tih thu sawiin a thlawna thisen pekin 100% a kai theih nan tan la chhunzawm zel turin a fuih a ni.

Vawiin programme ah hian Voluntary Blood Donation Award 2022 sem a ni a. Religious category ah Central KTP pakhatna niin TKP Coordination Committee, Aizawl leh PYD, North East India ten an dawt a. YMA Category ah Chanmari West Branch pakhatna, Bethlehem Vengthlang leh Aibawk Branch te pahnih leh pathumna an ni a. College zingah Pachhunga University College NSS ten lawmman pakhatna dawngin Hrangbana College leh Aizawl College NSS ve ve te chuan pahnih leh pathumna an dawng a. Higher Secondary School ah Synod HSS NSS te pakhatna, Helen Lowry HSS NSS te pahnihna niin Govt Cengral HSS NSS te pathumna an ni a. Miscellaneos Category ah MNYF, Mizo Chelsea Suppporters Club, 225 CRPF Zemabawk ten pakhatna atanga pathumna lawmman an la. A pumpuia ti tha Overall Special Award ah Central KTP in lawmman pakhatna lain Mizoram NSS leh Central YMA ten pahnihna leh pathumna an la a ni.

Mizoram chhungah vawi 50 chuang thisen pe tawh mi 27 an awm a. Thisen pe hnem ber te chu Pu C.Lalremruata Electric Veng leh Pu RC Rokhuma Mission Veng te niin tum 83 ve ve an pe tawh a ni.

Kum 5 kalta chhunga thisen pek dan tlangpui chu hetiang a ni:

Vawiin programme hi Health Secretary Pu R.Lalramnghaka’n a kaihruai a. A thlawna thisen dawngtu mi pahnihin an testimony an sawi a. SBTC Member Secretary Dr Malsawmtluangi Ralte chuan lawmthu sawiin hun hnung a khar a ni.