894/2022-2023
Aizawl, the 14th June 2022 : Information & Public Relations Department leh Mizoram Art Development Society(MADS) tangkawp buatsaih MADS Annual Art Workshop, 2022 chu vawiin khan Aizawl Art Gallery ah hawn a ni.

Pu C. Lalnunkima, Director I&PR chuan Workshop hi hawngin Lemziak mite hi mi bik, mi zawng zawngin an tih theih loh rohlu nei an ni ti hre rengin, an thiamna te chu midangte tana hmang tangkai turin a chah a. He workshop-ah hian Lemziak mite chu thahnem ngai taka thawkrim tura chahin, hmasawnna chhar chhuak thei ngei tura tan la turin leh mahni kut kea dinga eizawnna atana hman tlaka inchher chhuak turin a duh thu a sawi.

Hawnna inkhawm hi Pu Laltanpuia, President, Mizoram Art Development Society in a kaihruai a, Pu Vanlalhriata, General Secretary hnen atangin Report tawi ngaihthlak a ni a. Workshop hian Ni 4(li) 14- 17, June 2022 chhung a awh ang. Member 58 telin Lemziak - Acrylic/oil, Water Color, Lem tuk(Sculpture) te’n an bei dawn a ni.