Vawiin hian Serchhip Auditorium ah Mizoram Health Department, Public Health Foundation of India leh National Health Mission tangkawp ten Ministry of DoNER sum hmangin Cancer leh Non-Communicable Diseases inzirtirna leh zawnchhuahna hun an buatsaih a, Pu Lal Thanzara, Minister, Health Department chuan khuallian niin a hmanpui.

He hun hawnna inkhawm Auditorium a buatsaih, Pi Sangchhin Chinzah, Serchhip Bawrhsap kaihhruaiah hian Minister chuan; kan nunphungte thlak danglama Cancer leh NCD natna hrang hranga Mizoram hming chhiatna tibo tura theihtawp chhuahpuiah Serchhip mipuite a sawm a. Nun dan phung tlema tihdanglam hlekin Cancer, HIV/AIDS, BP sang leh Zunthlum te lakah awlsam takin a inven theih a ni, a ti. Zuk leh hmuam, ruihtheihthil leh mipat hmeichhiat hman dik lohna nunphung hi Kristianna nena thil inpersan, kan kalsan ngam tur thil a ni a, eitur tui leh hmuihmer lam aia eitur hrisel leh thianghlim lam zawng zawk tawh tur kan ni, tiin he hun hmang tura kalkhawm mipuite a chah a ni. Sawrkar in hriselna lama hma kan sawn theih nana hma a lakna thenkhat sawiin, Zemabawka Mizoram State Cancer Institute chu sawrkar laipuiin Tertiary Care Cancer Centre a hlan kai nan Rs. 44.27 crore a pawmsak thute, Superspecialty Cancer Centre a hlan chhoh tuma Japan mithiamte nena indawr mek a nih dan te, Falkawna Medical College thar (MIMER) chu changtlung taka kalpui tan a nih thute, NEDP hnuaiah District Hospital hrang hrang chu an mamawh hmanrua leisak an nih thute a tarlang a ni. Khuallian hian, hetiang hun tangkai leh mipui tana hlu buatsaihtu Health Department te chungah lawmthu a sawi a, Serchhip khawtlang mipuite an vannei hlea a hriat thu sawiin, Serchhip District Hospital thar sakna tur sum mamawh Central sawrkara dil mek a nih thu a tarlang bawk. Pu Lal Thanzara hian, National Health Missions hmalakna hnuaiah Mizoram mipui kum 30 chin chunglam chu NCD Screening enfiah vek tura hmalak a nih tur thu a tarlang bawk.

NEDP atang hian Serchhip District Hospital ngei pawh NEDP atangin kum 2016-17 ah hmanraw mamawh chi 29, kum 2017-18 ah hmanraw mamawh chi 37 zet leisak an ni a. Heng Hospital mamawh khawl thar hrang hrangte hi khuallian Pu Lal Thanzara hian official in vawiin hian a hawng nghal a ni.

Vawiina Health Mela hawnna inkhawmah hian Mizoram State NCD Nodal Officer Dr. Eric Zomawia chuan Cancer leh Non-Communicable Disease natna lama Mizoram dinhmun tlangpui tarlangin a invenna awlsam neih dan te a sawi a. Mizoram chu Cancer ah India ramah pakhatna kan ni reng a, tunhnaiah Hmeichhe Cancer bikah Arunachal Pradesh in min lehpel ta rih. Serchhip District hi District ho zingah kan sang fal leh bawk. India rama thihna 60% hi Cancer leh NCD natna vanga thleng a ni tawh mek bawk. Heng natna laka kan him theih nan thil pali a pawimawh, zuk leh hmuam nghei, Zu in nasat loh, Awm awl lutuk loh leh chi/thlum/thau ei nasat loh mai te an ni, a ti.

Public Health Foundation of India aiawha lokal Dr. Priscilla C. Ngaihte pawhin thusawiin zohnahthlak nih hi chhuan tham, nuam tak a nih mek laiin Cancer leh NCD lamah India ramah pakhatna kan hauh tlat si a. He hminghliauna hi kan nuai bova, hnam fing leh puitling, entawn tlak kan nihna kan tihlan a tul a ni. Hriselna lama kan lan dan (Health Scenario) leh nunphung hi kan thlak anga, heng natna tihbaiawm tak takte hi kan hneh thei a ni, tiin mipui kalkhawmte a fuih a ni.

Mizoram Institute of Medical Education and Research (MIMER) Director, Prof Dr L. Finate pawhin thusawiin, Falkawna Medical College (MIMER) chu hmanraw changkang leh tunlai ber ber te nena thuam a nih tawh thu leh, duhthusam chu tlin rihlo mah se a lungawithlak tawk hle thu a sawi a. Kumin August thla atanga zirlai naupang lak luh tan an nih tur thu a tarlang a ni.

He hunah hian Miss Mizoram 2018 Contest a Top 3 te chu mipui hmaah inlanin Cancer leh NCD natna chungchanga an ngaihdan leh taksa enkawl dan thate mipuite zirtirna hun an hmang a, zaithiam ten hun an hmang bawk.

A hawnna inkhawm neih zawh hian mipui tan a thlawna inentirna buatsaih nghal a ni a, he inentirnaah hian Doctor 28, line hrang hrang chi 13 a thiamna bik nei ten inentirna dawhkan 37 ah a thlawna inentirna an kalpui zui nghal a. Chhun dar 12 thleng khan inentir tura hmingziak mi 1305 ten hming an ziak a ni.

Hetiang hun hi Kolasib ah buatsaih tawh niin Serchhip hi a pahnihna a ni a, Mamit lamah la neih chhunzawm leh tura ruahmanna siam ani.