Vawiin chawhma khan Rural Development Minister Pu R.Lalzirliana chuan State Institute of Rural Development & Panchayati Raj (SIRD&PR) Building-ah Rs 100 lakh senga sak State Panchayat Resource Centre(SPRC), VC Inpui tih bawk chu a hawng.
SPRC hawngtu RD Minister Pu R.Lalzirliana chuan thingtlang khuaah te hmasawnna chak zawka kalpui a nih theih nan khawneitu leh hruaitu, Village Council Member-te chu sawrkar anga zirtirna pek that a pawimawh tih a sawi a. A bik in development programme leh scheme hrang hrangah te VC member te mit tih var sak a tul hle a ni a ti. "VC te chuan vawiina kan hawn, SPRC hi an theihna peipuna zirna hmun a tan hman nachang an hriat a pawimawh tak zet a. Tin, Aizawlah sawrkar dawrin in lo kal a nih pawhin in tan SIRD-ah hian thlenna a awm mai ni lovin nangmahni pui thei tu tur mithiamte pawh an awm bawk a ni", a ti.
Tun hma chuan SIRD&PR chu Rural Development Department mi leh sa ten an hnathawh kaihhnawih thila an inzirna leh an intahhriamna hmun atan an hman thin thu sawiin tunah chuan Village Council member te tan pawh training na hmun pawimawh tak a ni tel tawh tih a sawi a. VC te chuan khawvel changkang zelah, pi leh pute hun lai atanga chin dan tha te hloh chuang lovin, tunlai changkanna milin an ngaihduahdan phung, an hawiher leh an khawsak zia thlengin her rem ve pawh a ngai tawh a ni a ti. "Sawrkar ngaih pawimawh em em chu thingtlanga chengte hmasawnna ngaituah a ni a. Hemi kawngah hian kan thingtlanga chengte zinga khawsak harsa zawkte pualin hamthatnate ruahmanna a ni thina. Hengte hi a khawsak ziawm zawk te chuan lo chuhpui thin lo turin kan in ngen duh bawk a ni", a ti.
SPRC hawnna hi SPRC Auditorium-ah neih niin SIRD&PR Director Pi Maria CT Zuali'n a kaihruaia, he hunah hian LAD Director Pu RS Lalzamliana leh official dang te bakah, Durtlang VC te an tel a ni. SPRC sakna sum hi Ministry of Panchayati Raj, Government of India atanga hmuh a ni a, June 10, 2016 ah sak tan niin August 3, 2017 ah sak zawk a ni. A building pumpui lenzawng chu Square Metre 450 a ni a, a chhungah hian Auditorium Mi 100 chuang lenna, vawi khata mi 80 vel chawkil theihna pindan(Dining Hall), Zunram thiarna leh Library Room te a awm a ni.
