Vawiin khan Lal Thanhawla Auditorium-ah Mizoram State Cooperative Union (MSCU) chuan General Assembly vawi 31-na an hmang a. Cooperation Department Minister Pi Vanlalawmpuii Chawngthu chu Khuallian niin Finance Department Secretary Pu Sawihlira,MF&AS chu Khualzahawm a ni.

Khuallian Pi Vanlalawmpuii Chawngthu chuan thu sawiin Mizoram State Cooperative Union (MSCU) general assembly vawi 31 hman a ni chu lawmawm a tih thu a sawi a. MSCU hi mi hnuaihnung zawkte thleng phak a ni a, midang te tana malsawmna ni tura thawh kan tum tur a ni, a ti a. MSCU hnuaia society hrang hrang ten hma an sawn theih nan theihtawpin hna kan thawh a ngai a, min mamawhtute tana tangkai leh dawr nuam tak kan nih a ngai a ni, a ti a. Mizoram chhunga cooperative society a lo pun zel nan leh society tha zawk din a nih theih nan MSCU chuan hma a la thin a ni tiin society hrang hrang pawimawhna kan phawrhchhuak thiam tur a ni, a ti a. MSCU Office building thar sakna turin hmalak mek a nih thu a tarlang a. Chawhnu lama inthlanna felfai tak nei turin duhsakna a hlan a ni.

Mizoram State Cooperative Union (MSCU) hi March Ni 29, 1975 khan din niin Assam State hnuai Aizawl District Registrar of Cooperative Societies (ARCS) enkawlna hnuaiah din a ni. Tun dinhmunah hian MSCU-ah thawk nghet 23 awmin muster roll 3 leh contract 3 an awm. MSCU hnathawh kaihruai turin Assistant Registrar of Cooperative Societies (ARCS) chuan Chief Executive Officer, MSCU a chelh a ni. Mizoram State Coopreative Union hnathawh dan kalphung duanga kaihruai turin Board of Directors an awm a, hemi hnuaiah hian committee peng pahnih Executuve Committee leh Staff Selection Committee an awm a ni. MSCU hi society hnena zirtirna petu a nih angin kum 2017-2018 chhung khan training hrang hrang a buatsaih a, chungte chu: Cooperative Awareness Programme, Refresh Course Training, Leadership Development Programme, Youth Education Programme, Village Level Education Programme an ni.

Programme hi MSCU President Pu Lianthangpuia chuan kaihruaiin kalkhawmte lawmna thu a sawi a. MSCU Chief Executive Union Pi Lalnuntluanga Hrahsel atangin annual report ngaihthlak a ni a. MSCU Vice President Pu K. Lalnunpuia chuan lawmthu sawina in hun a khar a ni. Chawhnu lamah rorel inkhawm neih niin kum 2017-2018 Annual report thlirho niin pawm a ni a, kum 2017-2018 Annual Audited Financial Statement thlirho a ni leh a. Kum 2018-2019 atana sum hman tur ruahmanna Budget Proposal pawh sawiho a ni. Hemi zawhah hian hruaitu thlanna neih nghal a ni.