2499/2023-2024

Aizawl, 26.10.2023: Vawiin khan DC Conference Hall ah Aizawl District Election Officer Pi Nazuk Kumar, DC Aizawl chuan MLA inthlanpui lo awm tur chungchangah Aizawl district chhunga bank hrang hrang hotute a kawm. Expenditure Observer Pu Nayanjyothi Nath pawh a tel a ni.

Candidate te'n campaign nan sum hman theih chin an neih avangin leh felfai leh thianghlim taka inthlanna neih a nih nan candidate te hausakna leh an sum neih zat zawng zawng puan a ni thin a. Account an neihna bank te chuan candidate te sum che vel lo thlithlai tura phut an ni. DC Pi Nazuk Kumar chuan Mizoram chu khawtlang nun a felfai in, inthlanna kalphung pawh hahdamthlak phah viau mahse mawhphurhna chelhtute chuan inthlahdah lo a an tih tur chin theuh uluk taka an hlen a pawimawh thu a sawi.

Expenditure Observer Pu Nayanjyothi Nath pawhin Banker te chu fimkhur taka contesting candidate te account chu vil turin a chah a. Nitin report pek tur a nih thu te, sum tam tham lut leh chhuak te state pawn atanga transaction tam tham rawn lut leh thildang rinhlelhawm awm thei te uluk taka vil a pawimawh thu a sawi.

Vawiin meeting ah hian Bank hrang hrang aiawhte bakah Income Tax, Police leh sawrkar department dang thenkhat aiawhte an tel a ni.