No.4208/2021-2022

Aizawl the 9th March, 2022 : State Institute of Rural Development & Panchayati Raj (SIRD&PR), Mizoram leh National Commission for Women, New Delhi tangkawp buatsaih, Aizawl Municipal Corporation (AMC) Ward IX - XIX huamchhunga thlanbik Local Council member hmeichhiate tan ni thum (9 – 11.3.2022) chhung awh tur Capacity Building Programme on ‘She is a Change-Maker’ for Women in Politics chu vawiin ni 9.3.2022 khan SIRD&PR, Durtlang Leitan-ah a hawnna neih a ni a. Pi Lallianpuii, Director, Women & Child Development Department chu Khuallian niin, he training hi a hawng a ni.

Pi Lallianpuii chuan hmeichhia Local Council member-te chu hetiang dinhmun an thleng thei chu a lawmpui thu sawiin, Politics-ah hmeichhiate hian hmasawnna tur leh tih tur an nei a ni tih an hriat reng a pawimawh a ni, a ti a. In chhungah kan fate kan enkawlna kawngah an fimkhur a pawimawh a, mipa leh hmeichhia an enkawlna kawngah a bik awm lova, in ang tlanga an enkawl thin te a pawimawh thu a sawi bawk. Politics-ah Mizo hmeichhiate hian danglamna an thlen thei a ni tih hria a, hmasawn zel tur an ni a. Tunah phei chuan hmeichhe MLA pawh an nei lo a, tan kan lak a ngai hle a ni, a ti a. Hmeichhiate chawisang a, humhalh a, hmasawn tura hmalakna kan tih hian mipa chunga leng a, mipate hnuaichhiah tur tihna a ni lo tih erawh hriat reng a pawimawh a. Chutih rual chuan hmasawn tura tan an lak zel erawh a tul em em a ni, a ti bawk a ni.

Local Council Member hmeichhiate chu an huamchhunga hmeichhia harsatna tawkte tanpui a, tanpui theitu tur kawhhmuh a, hmalak pui thin turin khuallian chuan a ngen a. Hmeichhiate humhalh leh venhim kawnga dan tha tak kan neihte hi dik lo tak leh kan huat zawng mipate tana chhiatna leh harsatna thlen nana hman theih a nih avangin dik tak leh fimkhur taka kan hman erawh a ngai a ni, a ti a. An Department hnathawh leh hmeichhiate humhalhna kawnga dan leh hmalakna hrang hrang te a tarlang bawk a ni.

Training hawnna hun Pu Lalhmunsanga Hnamte, Director, SIRD&PR chuan a kaihruai a. Pu H. Rosangpuia, Course Director/ Faculty (RD/PA), SIRD&PR chuan training neih dan tur tlangpui leh an zir turte sawiin, Pu David K. Lalthanmawia, Faculty, SIRD&PR chuan lawmthu sawiin training hawnna hun hi a khar a ni.

He Training-ah hian Local Council member hmeichhia 43 an tel a. Mithiam hrang hrang ten kalkhawmte zirtirna an pe dawn a ni.