Chhingchhip-a MIFCO thei tui herna leh sawngbawlna khawl chawm tura captive plantation kalpuina tur NLUP cluster 7 huam chhunga khaw 42 ah NLUP scheme, Technology Mission leh RKVY hnuaia hmalakna te inbawh thuah lova, mumal zawka hma lak a nih theih ruahmanna siam turin vawiin khan NLUP Nodal Minister Pu H.Liansailova hovin a office chamber ah meeting neih a ni a. Bialtu MLA leh NLUP Implementing Board hotute, Sinlung Hill Development Council hotute leh department kaihnawih te bakah implementing agency hrang hrang te an tel a ni.

Captive plantation kalpuina turah thil chinfel ngaite buaipui turin vawiina Minister hova meeting chuan NLUP Implementing Board hnuaiah Co-ordination Committee din an rel a. Scheme hrang hranga beneficiary inthuah a awm loh nan NLUP convergence plan anga hmalak dan tur te, implementing agency hrang hrang te hmalakna tur ramri kham sak chin tur te, beneficiary te thar chhuah leisakna tur guarantee price siam dan tur chungchang a mawhphurhna chu he committee kutah hian dah a ni. Agriculture department chu he committee ah hian nodal department niin line department leh implementing agency te member an ni a. Cluster 7 a bialtu MLA te chu Adviser angin an awm bawk ang.