Chief Minister Pu Lal Thanhawla chuan zofate hi chibing ang zawnga kal tham kan nilo a ti. He thu hi vawiina Sangau khaw thlang lam 40 kms vela hlaa awm, Lungtian khuain kum 140 an tlin lawmna YLA khelmuala Lal Ropui Hausata Runa inkhawm an buatsaihnaa a sawi a ni. Lungtian kum 140 a tlin hriatrengna lungphun hi Chief Minister hian a hawng bawk.

Chief Minister chuan Lungtian khuain kum 140 a tling thei chu lawmpuina chibai bukin duhsakna a hlan a. Mizoram khawilai kil ber pawha cheng nimahila a neitu vek kan ni a, mawhphurhna leh chanvo kan neihte a inang vek a ni a ti a. A chibing zawnga kan tlem anih pawhin India Danpui hnuaiah kan intluk tlang vek a, inla hrang bik tur pawh kan awlo a ti a.A leilung fate inuanauna leh inlungrualna hi a pawimawh ber a ni a ti. Chutiang atan chuan sorkar pawhin theihtawp a chhuah reng a, pheikhai rual taka hma kan sawn tlan hi kan duh ber a ni a ti.

Chief Minister chuan kum 2008 inthlana Zoram mipuite tawngtaina hla ber chu kan rama rorelna tha, rorelna dik leh rorelna fel a awm theihna tur a ni a, an tawngtai chhanna chu keini hi kan ni a, chuvangin Pathian ruatte kan nih avangin min eptute pawhin sawiselna tur an hrelo a ni a ti. Pu Hawla chuan an sorkar tirh atangin thil tum pathum pawimawh tak tak an duan thu sawiin, Zafate zingah mi hausa leh mirethei te inkar zau zel tur vena, mirethei chanhai te leh chhumchhia ten lei rem an raha khaweng an hmuhna turin NLUP chu a hmanruaah kalpui a ni a ti a. Thalai te tan khawvel thar siam sak bawkin infiamna lem leh zirna sang zawk an neihna turin kawng tam taka hma an lak thu a sawi bawk a. Hengte bakah hian kan khawtlang nun min tichhetu eirukna leh hlemhletna, corruption doa, a zung phawia phoro a ni a ti a. Corruption tih hian eirukna chauhlo thatchhiatna te, dawngdahnate, thuawih lohna te, kuttling lova sum lak duhna te leh mahni hnaa tui lohna te a huam vek a ni a ti.

Chief Minister chuan Mizoram chhimlama hmasawnna tura sorkarin hmalakna hrang hrang a neihte a sawilang bawk a, Autonomous District Council ten central atanga dirct funding an dil pawh chak zawka hmasawnna an neihna tur anih beiseiin an thlawp thu a sawi a. A hlawhtlinna erawhchu central sorkar thu a ni a ti.

Chief Minister hian Lungtian kum 140 tlin lawmpuina thilpek Organising Committee Chairman leh inkhawm kaihruaitu Pu H.Hranglina hnenah a hlan bawk a. Organising Committee pawhin Chief Minister te nupa hneneah chawimawina thilpek an hlan bawk a ni.

Ni hnih chhung lawmna turah vawiin a nikhatna inkhawmah hian Lai Autonomous District Council CEM Pu C.Ngunlianchunga chu khualzahawm niin, souvenir a tlangzarh bawk a ni. Naktukah kum 140 lawmna hi chhunzawmin bialtu MLA Pu H.Zothangliana, Parliamentary Secretary chu khuallian a ni anga, a khawnawtin ruai nen an lawm dawn a ni.