Aizawl Civil Hospital Cardiology Department cheng vbc 4.99 senga din leh CT Scan khawl thar chu vawiin khan Health Minister Pu Lalrinliana Sailoa’n a hawng.

He Cardiology Department leh CT Scan khawl thar hawnna inkhawm Pi Esther Lalruatkimi, Secretary, Health Department kaihhruaiah hian Minister chuan Health Department chu Pathian hruaina avanga hmasawnna leh thanna duhawm tak tak an hmu a ni tiin, hei hian Department hotute leh hnathawkte inpekna leh thawhrimna a tilang chiang hle a ni, a ti. Minister chuan Cardiology (Lung lam) Department hawn theih a ni ta chu lawmawm atih thu sawiin, lung lama harsatna tawk tam zawk chu phai lama kaltir/thawn zel an ngaih tawh dawn loh avangin sorkarin sum tam tak a hum phah dawn a ni, a ti. MRI khawl pawh Aizawl Civil Hospital-ah leh Falkawn-ah dah anih tur thu a sawi bawk. Minister chuan he Department hawn anih theih nana Dr. Loncy V. Lalzarliana, Cardiologist (Super Specialist) leh a thawhpuite hmalakna leh inpekna chu fakawm a tih thu a sawi bawk. Minister hian Gynecology Ward sak mek chu a en nghal bawk.

Dr. Lalrinliana Sailo, Principal Director chuan Cardiology Department din chhoh dan leh CT Scan khawl thar lei anih dan te report a pe a. Cardiology Department siamna tur DPR cheng 4.99 vbc chu NEC-ah thehluh niin, 26 November, 2012-ah khan pawm a ni a. Pawisa hi instalment a pek chhuah niin, tun dinhmunah hian cheng nuai 280 pekchhuah tur a la awm a ni.

CT Scan khawl thar lei na hi NEC atang veka sum hmuh niin, cheng nuai 280 phalsak a ni a, cheng nuai 100 pekchhuah tawh a ni a. Sum hi NEC-in 90% tumin, state-in 10% a tum thung a ni.

Dr. Lalbiakkima, Director, Hospital & Medical Education-in lawmthu sawiin he hun hi a khar a ni.