Chief Minister Pu Lal Thanhawla chuan “ Sawrkar chuan Power lama intodelh turin hma thui tak a la mek a. Natural Gas pawh thahnem tak kan ram chhungah hian a awm a ni, a ti.

He thu hi vawiin khan Tuirial Hydro Electric Project 60 MW pe chhuak thei tur hna thawh mek tlawhin a sawi a. Tui khuahna tura hnathawhna hmun section hrang hrangte chu fang kualin hengahte hian an hnathawh dan chipchiar a en bakah Engineer ten an lo hrilhfiah zel a. Heng hmunte a fan zawha inkhawmna hun, NEEPCO in an buatsaihah hian chief Minister chuan Tuirial HEP hna thawhna hmuna awm khaw thenawm Saipum leh Saiphai khaw mipuite chu hnathawh tichak tura kawng tinrenga puitu ni turin a ngen a. NEEPCO–in heng khaw mipuite hman theih tura Bazaar lian tham tak leh Community Hall an sak dawn thu pawh sawiin hei hi thil hlu tak tur a ni, a ti a, NEEPCO chungah pawh lawmthu a sawi nghal a ni.

Pu Lal Thanhawla chuan kum 1998-a hnathawhna tur lung alo phum tawh, compensation sum itna avang leh thildangte avanga hun rei tak tih khaihlak a nih hnua kum 2011-a tih thar leh a nih chungchangah central sawrkar lawmthu a hrilh a. Tuirial HEP hi ram tana rotling tur a nih avangin a chhehvel khuate chu neitu rilru pua engkima puitu leh hmunhma tinuamtu ni theuh turin a chah bawk a ni.

Home Minister Pu R. Lalzirliana pawhin thu sawiin Tuirial chhehvela mipuite chu hna ti thuanawp zawnga engmah tilo turin a chah a. A kawi zawnga tuma fuihpawrha awmlo tura chahin thawh zawh a nih hunah chuan a zar zotu leh kawng engkima hmasawnna zar zotu inla ni dawn a ni, a ti a ni. Tuirial HEP hi July 1998 khan cheng 368.72 Crore Estimate-a thawh tan a ni a, amaherawhchu June 2004 atangin hna tihtawp a ni a, January 2011 khan Project hi tuai thar lehin Rs 913.63 crore hmang a thla 36 chhunga thawh zawh hman tura tihnun leh a ni.

Chief Minister hi a nupui Pi Lal Riliani , Home Minister Pu R. Lalzirliana leh Pu TP Khaund, Principal Adviser, Govt. of Mizoram ten an tawiawm a. NEEPCO hotu Chairman-cum-Managing Director Pu P.C. Pankaj leh midang ten khuallian te hi an dawngsawng a ni.