Mizoram State Council for Child Welfare ten naupang te zual deuhte tana tangkai leh mit la tur taka Esopa thawnthu hrang hrang Cartoon-a buatsaih chu vawiin chawhma khan I & PR Auditorium-a inkhawm buatsaihah Social Welfare Minister Pu P.C. Lalthanliana chuan a duh apiang lei theih turin a tlangzarh.

Minister chuan pipu te tangin Mizote hi naupangte hmakhua ngaihsak thiam lo, naupangte thlahthlam ching tak hnam kan nih thin avangin Mizo nunah pawh nghawng tam tak a nei a ni, a ti a. Tunlai khawvel thiamna sang zawk hunah erawh hi chuan naupangte hmakhua leh an hamthatna humhalh chu thil tul a ni tih kan hre ta hle a. An lawm zawng leh mit la ennawm chi hrang hrangten an nun nasa taka a kaihhruai theih avangin hetiang zirtir tha tak tak nei hmuhnawm siamchhuah nachang  State Council for Child Welfare ten an nei chu fakawm a tih thu leh heng film te hian naupang thangmekte hnenah rah duhawm tak a chhuah ngei a beisei thu a sawi a. ‘A bula tih that chu a chanve zo tluk a ni’ an tih angin tuna naupang te zualte kawng dika hruai hian nakina kan ram thatna tur a hril dawn a ni a ti.

Vawiina Cartoon film tlangzarh hi Pu Thanseia, Working President, MSCCW in a kaihruai a, an pawl hmalakna tlangpui leh cartoon film buatsaih dan Pi Lalzarliani, General Secretary, MSCCW chuan a sawi.

Mizoram State Council for Child Welfare hi kum 1952 daiha lo din tawh Indian Council for Child Welfare hnuai ami niin naupang te hmakhua thatna tura hnathawktu pawl a ni a. Mizoram Larsap chu Patron-in-Chief niin Social Welfare Minister Pu P.C. Lalthanliana hi President a ni mek. MSCCW hian naupang huaisen 13 lai te chu National Bravery Award dawng turin a lo chhawpchhuak tawh a. Tunah hian naupang te zual, sikul la lut pha lo, an nu leh pa ten tul na avanga hna an thawh bo san hote tan Day Care Centre, Creche chu Mizoram hmun 75 laiah an kalpui mek a ni. Naupangte thanlenna kawnga tangkai tur painting competition-te, state dangte nena intlawhpawh programm-te a kalpui mek bawk. Tunlai khawvelah naupangte tana film tha lo leh nasa taka a chhe lam zawnga an nun kaihruai thei cartoon tam tak a chhuah mek dona chi khat atan he Esopa thawnthu fing hrang hrang atanga Mizo tawng ngeia cartoon film hi buatsaih hlawhtlin a ni ta a ni.