No.189/2021-2022

Dated Champhai, the 19th April, 2021: Vawiin chawhnu dar 3 khan tuihna humhalh leh ruahtui khawl kawnga hmalakna Jal Shakti Abhyan hnuaia Catch the Rain Campaign neih zelna kawnga senso tur leh thawhkhawm dan tur relin Head of Office-te DC Conference Hall, Keifangtlangah an thukhawm.

He hun kaihruaitu Bawrhsap Pi Maria C.T Zuali chuan ruah sur tha tak kan dawnte luang ral mai lova bawlhhlawh laka fihlim leh thianghlim a chantira kan khawl khawm thiam a tul thu a sawi a. Catch the Rain Campaign inzirtirna zau zawk nei tura tanlak tul ni a hriat a nih avangin senso ngaite department tinte atanga thawhkhawm mai nise ti a ruahmanna siam a ni, a ti a. Bawlhhlawh siamtu tam ber plastic polythene-te hnualsuat a nih theihna tur leh bawlhhlawh hal mai mai loh intihhmuh kawngah sawrkar department hotute chu hmahruaitu leh midangte kawhhmuhtu nih tum tura chahin, department tinte inhawng leh thahnemngai taka tawiawm tlat turin a ngen a ni.

Pu R.Lalnghakliana, PD & DRDA Champhai, Member Secretary, Catch the Rain Campaign, Champhai District hnen atangin Catch the Rain Campaign awmzia, thil tum leh hemi hnuaia hmalakna turte a tarlang a. Senso ngai turte leh department thawh dan tur bituk siam chhinte a sawifiah bawk.

Catch the Rain Campaign thil tum leh tangkaina hrang hrangte bakah kan ramin kan chhawr tangkai theih dan turte sawiho niin, a hranpaa campaign kalpuina leh program huaihawtna tur senso dah a nih loh avangin sawrkar department hrang hrang ten pawisa thawhkhawm nise tih a ni a, thawh zat tur bituk siam nghal niin khawn turte ruat fel nghal a ni bawk.

Catch the Rain Campaign hi March ni 22, 2021 khan neih tan niin, November ni 30, 2021 thleng a awh dawn a. Hemi hun chhung hian mipuite hnenah zau zawka ruahtui tla khawl khawm leh tuihna humhalh tangkainate hrilhhriat a ni dawn a. Seminar, workshop, hnatlang leh rally-te neih thin a ni ang.