No.190/2021-2022

Dated Khawzawl, the 19th April, 2021: District Rural Development Agency (DRDA), Khawzawl District buatsaihin tukin khan Khawzawlah 'Jal Shakti Abhiyan Catch the Rain Campaign' kaltlangin Rally buatsaih a ni.

Khuallian Bawrhsap Pu Zothanmawia chuan Catch the Rain Campaign denchhenin kumin chhunga MGNREGA hnuaia khawtinin hna kan thawh turah ruah tui khawl khawmna lam hawi hnate uar zawka thawh theuh a pawimawh tak zet tih a sawi a. Tui hna humhalh kawngah tan lehzual a tul thu leh thingphun uar a pawimawh hle tih sawiin, district mipuite theihtawp chhuaha tanhopuiah a sawm a, Catch the rain campaign chu Khawzawl Zaingen Veng Taidawnkawn atangin a vailiam a ni.

Rally bultanna inkhawm tawi buatsaihah Pu Lalzakhama, Executive Engineer, PHE Khawzawl WATSAN Division chuan kumin thal chhoah gravity hmanga tui lakna hnarte a kang chat nasat thu leh khaw hrang hrangin tuilak kawngah harsatna an tawh thu sawiin, tui hnianghnar zawk nei tura beihpui thlak a pawimawh hle a ni, a ti.

Rally-ah hian DRDA, PHE leh BDO lama thawktute bakah Khawzawl Town a Village Employment Council member-te an tel a. Khawzawl Vengthar thleng banner leh placard kengin an kal a, rally tawpnaah hian Pu Lalrohlua, Project Director, DRDA in lawmthu sawiin rally hi a khar a ni.

District Headquarters a Catch the Rain rally neih rual hian Kawlkulh leh Chawngtlai khua a Mizoram State Rural Livelihood Mission hnuaia Self Help Group intelkhawm Village Organisation-te pawhin rally hi an nei bawk a ni.

Catch the Rain campaign hian a tum ber chu India ram chhunga thingtlang leh khawpui zawng zawngah ruahtui khawlkhawm leh tuihna tipung tura hmalakna tlo leh tha neih dan kawng zawn a ni. Jal Shakti Abhiyan - Catch the Rain Campaign, 2021 hi March 22, 2021 atanga November ni 30, 2021 Monsoon thlen hma leh thlen lai denchhenin India ram a district 729 ah neih tur a ni a, he campaign theme chu 'Ruahtui tlakna hmunah, a tlak laiin ruahtui khawlkhawm rawh' tih a ni. India ram Prime Minister chuan World Water Day March ni 22 khan he campaign hawnna hun hi a nei a ni.