No.215/2021-2022

Dated Champhai, the 21st April, 2021: Ruahtui khawlkhawm leh tuihna humhalh kawnga hmalakna Jal Shakti Abhiyan 'Catch the Rain' Campaign hmalakna kalzelah vawiin khan District Rural Development Agency (DRDA) Champhai leh Deputy Commissioner’s Office, Champhai tangkawp buatsaihin Govt. Champhai College Multipurpose Hall-ah seminar neih a ni.

He hun kaihruaitu Bawrhsap Pi Maria C.T Zuali, Chairman, District Water and Sanitation Committee ni bawk chuan ruahtui khawl khawm leh tuihna humhalh kawng inzirtirna seminar huaihawt a ni chu lawmawm tiin, ruahtui khawlkhawm leh tuihna humhalh kawnga hmalakna chu sawrkar department-te chauh mawhphurhnaa kan dah chuan a diklo a, kan zavaia thawhhona tur zawk a ni, a ti a. Seminar kaltlangin remchanna dang; Solid Waste Management leh thingphun uar chungchang inzirtirna leh Govt. Champhai College buatsaih leilung luangral tur venna Clay Model tha tak takte entir a ni chuan kan velah ngaihven ngai leh hmalakna tur tam tak a awm tih a tarlang a ni, a ti bawk.

Bawrhsap chuan Covid-19 inkaihhruaina avangin punkhawm tam theih a nih loh thu sawiin, sawm bik mi tlemte kalkhawmte chu midangte zirtirtu ni tura tan lak puiah leh puanven sawi chhinga theihtawp chhuah tlanpuiah a sawm a. Sawrkar Officer-te chu an rawngbawlna hre renga an thawhsak mipuite tanpui thei tura zau taka inhawng reng tur leh a hmun ngeia kalchilha enpui thin turin a chah a. Nakin hun ngaihtuah chunga Champhai tana tha tur hrang hrangtea hmalak leh tihpuitlin tum kawngah a khaw mi leh sa, nakin thleng pawha awm zel turte thahnemngai taka thawkchhuak turin a sawm a. Kum tluana kalpui tura duan Catch the Rain Campaign senso tur a hranpaa dawn ni lo mah se, sawrkar department hrang hrang ten inhawng takin sum thawh an remtih thu leh an thawh mek thu sawiin, ni za inhlawhna neih thin kaltlangin nasa zawka hnathawh tum a nih thu a sawi bawk.

Er. C.Lalhmachhuana, SE, PHED Champhaiin tuihna humhalh dan turte sawifiahin, Champhai tui tlan ber Tuipui tui, Greater Champhai Water Supply Scheme chawmtu kam chak zia a tarlang a. Kum 2000 thal laiin tui haw chak zawng chu second khatah litre 400 a nih laiin, kum 20 liam hnu April Ni 17, 2021 ah chuan tui haw chak zawng chu nasa taka tla hniamin second khatah litre 38 a haw pha tawk a, hei hian nitina Champhai tui mamawh phuhru tura tui haw chak zawng ngai zat second khata litre 40 chu a pha lo a ni, a ti bawk.

He hunah hian Pu Lalduhthlana, DFO Champhai chuan ruahtui dawn thleng catchment area-a lei leh tui luangral mai mai tur ven theih dante a sawifiah a. Pi Esther Leihang, DLAO Champhai hnen atangin tui thianghlimloin luia cheng nungchate leh mihringte a nghawng theih dan hrang hrangte a ngaihthlak a ni bawk.

Hemi hnu hian kalkhawmte chuan van ruahtui tla khawl nachang hriat leh tuihna humhalh tangkainate an sawiho nghal a ni.