No.216/2021-2022

Lawngtlai, Tau thla ni 21, 2021: Vawiin khan Lawngtlai District Level Task Force on COVID-19 (DLTF) chu an Chairman, Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng lo hluar thar leh chungchanga hma lak chhunzawm zel dan tur an sawi ho.

Chairman Dr Andrew H. Vanlaldika chuan COVID-19 hri leng thawh hnihna lo hluar thar leh mek laka mipui kan him theih nan Mizoram sawrkarin April ni 20 leh April ni 26, 2021 inkar chhunga inkhuahkhirhna a duan chu Mizoram puma hman tur a nih angin Lawngtlai District chhungah pawh hman ve nghal a nih thu sawiin, hemi zulzui hian Lawngtlai District pum leh Lawngtlai khawpui chhung bika inkhuahkhirhna kalpui dan tur pawh a hrana tihchhuah tawh a nih thu a sawi a. Sawrkar ruahman angin COVID-19 Executive Duty pawh din thar leh a nih thu te, thupek zawm lote hremna pawh dan ding lai anga kalpui tur a nih thu te sawiin, inkhuahkhirhna chu tha taka zawm turin District mipuite a chah a ni.

February ni 28, 2021-a Lawngtlai District-a COVID-19 positive enkawl damte chhuah kimtir an nih hnuah sawrkar, tlawmngai pawl leh kohhrante tan hona zarah leh District mipuite thu awih avangin hun eng emaw chen positive neih belh lovin Lawngtlai District a awm tih sawiin, Lawngtlai Bawrhsap chuan tuna COVID-19 thawh hnihna lo thleng leh chu chiai phah si lo va, min fimkhur thartirtua hman thiam a pawimawh thu a sawi a. Lawngtlai District chhungah Borkolok khua chu hri leng laka fimkhur thilah 'containment zone' atan puan mek a nih thu a tar lang bawk.

Chairman chuan member kal khawmte leh Lawngtlai khawpui chhung veng hrang hrang Village Level Task Force ai awh kal khawmte chu theih tawp chhuaha COVID-19 dona kawnga tan la thar leh turin a sawm a. Mipuite zawm tur inkhuahkhirhna leh inkaihhruaina chu sawrkarin siam mah se, mipuiin an zawm theih nana a taka thawktu leh hma latu tur chu VLTF-te an nih avangin an inthlahdah a thiang lo tih a sawi a, COVID-19 dona kawngah medical team, police leh executive duty te pawh tha taka lo thawhpui turin a ngen nghal.

DLTF Member Secretary, Lawngtlai Chief Medical Officer Dr LP Malsawma chuan Lawngtlai District dinhmun sawiin, Lawngtlai District chuan April ni 9, 2021 atanga COVID-19 positive case a neih thar leh thu leh tun dinhmunah positive 51 an awm mek thu a sawi a. Lawngtlai District chhunga COVID-19 positive-te hi IR CCC, Thingkah-ah mi 48 leh Chawngte CCC-ah mi 3 dah an ni.

Vawiin DLTF thut khawmah hian sawrkarin inkhuahkhirhna a siamte tha taka bawhzui a nih theih dan tur te, COVID-19 hluar thar leh mek laka Lawngtlai District a him theih dan tur rawtna hrang hrangte sawi ho a ni a. DLTF chuan chhiatni thatni leh puipunna hmuna inkaihhruaina tur sawrkarin a ruahmante chu tha taka zawm tura District mipuite ngenin, hmai tuam that, kut sil ngun, mi dang nena inhnaihchilh loh tih leh fimkhurna hrang hrangte tha taka zawm chhunzawm zel turin District mipuite chu an chah thar leh a ni.