Mizoram sawrkar hnathawkte tana Course on Computer Concepts (CCC) leh Course on Computer Concepts Plus (CCC+) training buatsaih batch rukna chu vawiin khan National Institute of Electronics and Information Technology (NIELET) conference hall ah Industries Minister Pu H.Rohluna’n a hawng.
Pu H.Rohluna chuan khawvel hmasawn zelah Information Technology (IT) tel lovin hna a thawh hleitheih tawh lova, India ram pawh IT khawvelah thuk zawka zuan luh tumin Digital India hmangin hma a la a, chuvangin sawrkar hnathawkten IT thiamna kan neih a tul tak zet tawh a ni, a ti. Mizoram sawrkar hmalakna a NIELET changtlung tak kan nei hi kan vannei tih sawiin Minister chuan thalai tam tak IT thiamna a pek bakah sawrkar hnathawkte pawhin an tangkaipui a, cyber crime chungchangah pawh nasa takin sawrkar an pui a ni, a ti a. Minister chuan sawrkar office ah e-governance a tak tak a kalpui turin sawrkar hnathawkte an inbuatsaih a tul a, training hlawk taka nei tur leh an thiamna te midang zirtir chhawng thei khawpa inbuatsaih turin a chah a. Mahnia thiamna tak tak nei si lova certificate hawn ringawtin tangkaina a nei lo tih hriaa tihtakzeta an zirlai te zir turin Industries Minister chuan kalkhawmte a fuih a ni.
NIELET hian National e-Governance Division (NeGD) nena thawk hovin Preparing North East for Digital India tih project hnuaiah kum 2 chhung sawrkar hnathawkte training an pe dawn a. NeGD nena an inremna angin he kum hnih chhung hian hmar chhak state a sawrkar hnathawk 16,000 train chhuah an tum a. Batch tinah mi 25 zel neiin CCC programme-ah hian batch 400 neih an tum a, CCC+ ah batch 240 neih an tum a ni. Mizoramah chuan March 2016 a bul tanin tun thleng hian CCC ah batch 5, CCC+ ah batch 4 an training tawh a. Kumin sawrkar kum chhung hian candidate 200 an train dawn a ni. Batch 6-na training hi August ni 8 atang khan tanin vawiin hian official-a hawnna neih a ni.
NIELET hi kum 2001 khan din niin Industries Department leh sawrkar laipui Ministry of IT, khatihlaia Department of Electronics nena thawhhona MoU ziaka din a ni a. Kum 10 a upa a nih hnu kukm 2011-ah Boys leh Girls Hostel hawn a ni a, Lunglei Pukpuiah Integrated Infrastructure Development Centre (IIDC) ah acre 3 a zau chu NIELIT zauhna Centre atan sawrkarin a pe bawk a ni.
Training hawnna inkhawm hi Sr. Technical Assistant R.Dengchhunga’n a kaihruai a. NIELIT Director N.Debachandra Singh chuan thu sawiin Scientist ‘C’ Vanlalhmangaiha Khiangte chuan training chungchang kamkeuna a nei a. Commerce & Industries Jt.Director Pi R.Lalrodingi’n thu a sawi hnuah Sr.Technical Officer N.C Sundari chuan lawmthu sawiin hun hnung a khar a ni.
