Vawiin 9.08.2016 khan State Geological Programming Board (SGPB) Meeting chu an Chairman, Pu Zothan Khuma, Commissioner & Secretary, Commerce & Industries Department hovin Aijal Club-ah an nei.

SGPB Meeting hi kum tina neih thin niin Commerce & Industries Department hnuaia Directorate of Geology & Mineral Resources, Mizoram-in kum kaltaa an hnathawh thlirletna leh kumthara an hmachhawp sawi hova thlir lawkna hun atan an hmang a. Heng bakah hian State chhung leh pawna line department heng - Central Water Commission (CWC), Geological Survey of India (GSI), Indian Bureau of Mines (IBM) leh Border Road Task Force (BRTF) leh Oil Exploration Agencies (ONGC, OIL) etc. te hmalakna leh an hmachhawpte thlirho thin a ni bawk.

He meeting-ah hian Director, Pu Lalhmachhuana, Geology & Mineral Resources leh a hnuaia officer-te bakah CWC, GSI, PWD, PHE, P&E, MZU, AMC, BRTF, Environment & Forests & Climate Change, Minor Irrigation bakah ONGC leh Oil India Limited (OIL) representative te chu sawm (invitee) an nih angin an tel bawk.

He meeting-a SGPB Member Secretary-in a tarlan danin nikum 2015-16 chhung khan Directorate of Geology & Mineral Resources-in Minor Minerals (lung, balu etc.) atangin Revenue Rs.1,63,21,694/- hmuh niin Oil Exploration Agencies atanga Petroleum Exploration Licence (PEL) Fees an hmuh zat chu Rs. 3,18,71,090/- a ni bawk. Hengte hi Mizoram sorkar sum bawmah chhun luh vek a ni.