Mizoram Legislative Assembly Committee peng pakhat Committee on Estimates chuan Dihmunzawla PHE Department hmuna State Investment Programme Management and Implementation Unit (SIPMIU) hmalakna leh Bethlehem Veng Sewage Treatment Pipe Network siam hna kalpui mek te chu a hmunah an enfiah. Anni hi UD&PA, SIPMIU, PHED leh Assembly House atangin official-ten an tawiawm a ni.

Committee on Estimates Chairman Pu Lalrinliana Sailo chuan Department ten mipui rawngbawla hna an thawhna kawngah an sum hman mila hna an thawh a pawimawh thu sawiin, Committee on Estimates chuan heng hmalaknate hi a chhawr tur ber mipuite tan hman tangkai theih a ni dawn em tih enfiah chu an tum ber a nih thu a sawi a. Committee member-te chuan SIPMIU hmalaknate chu tluang taka zawhfel a nih chuan mipuiin nasa taka an la chhawr tur thu an sawi bawk.

SIPMIU chuan Dihmunzawla PHED hmunah 132/33 KV sub-station siam hna kalpui mek niin, tunah hian 35% zawh tawh a ni a. Luangmual substation atangin Aizawl khaw pumpui tuia chawmtu Dihmunzawla PHED tui pump khawl hi tih nun reng a ngaih avangin load-shedding tih fo a tul thin a. Tuna sub-station hi peihfel anih hunah chuan Dihmunzawla PHED pumping station atan bika hman tur anih avangin nasa takin kawlphetha indaihlohna a ti ziaawm tura ngaih a ni.

Vawiin hian Committee on Estimates member-te hian Bethlehem Veng leh Vengthlanga Sewage Treatment Pipe Network an enfiah a. He Pipe Network hmang hian Aizawl khawpui thli lakkhawm a bawlhhlawh thlitfimna hmun Chite a 10MLD Sewage Treatment Plant-ah veng 19 atanga in tin atangin bawlhhlawh lakkhawm a ni dawn a. Tunah hian veng paruk ah hna hi zawh tawh a ni.