Vawiin chawhma khan I&PR Auditorium ah CCDU PHE Department in Private a tui semtuten an tui hralhte a thianghlim zawk theih nan leh tui thianghlim lo sawngbawl dan zirhona an nei. He inkhawm hi Er. Lalmuanzova, CE, PHED chuan a kaihruai a, Dr. Lalchhingpuii, Enviromentalist chuan keynote address neiin tui thianghlim lovin mihring a tihnat dante leh indan dan kawng hrang hrang a sawi a ni.

He huna Khuallian Er. R. Lalfanliana, E-in-C, PHED chuan thusawi leh workshop hawnna hun neiin a hlawk thei ang bera hun hmang turin kalkhawmte a chah a ni.

Aizawl khawpui chhungah hian private-a regular taka tui zuar/hralh thinte hi mi 49 bawr vel an ni a, association anga an la din loh avangin a zat chiah hriat theih an ni lo a, anni bakah hian thal leh thlasik laia zuar thin engemawzat an awm bawk nia hriat a ni. He workshop buatsaihtu Communication & Capacity Development Unit (CCDU), PHE Department chuan Mizo mipuite hriselna ngaipawimawhin an Department kaihhnawih (tui lamah) mawhphurhna sang tak pua an inngaih vangin he workshop hi a buatsaih ta a ni.

He hunah hian SRI Chief Chemist Pu P.C. Biakmawia chuan ‘Tui thianghlim loh theih dan leh a tihthianghlim dan’ tih thupui hmangin paper a buatsaih a. A paper buatsaihah hian tui nihphung, tuihnar vawn thianghlim, thianghlim lo in vanga natna leh sum leh pai senso ngaih nasatzia, tui enkawl that hlawkzia, tui tihthianghlim dan, damdawia tui tihthianghlim thatnate sawiin hun a hmang.

SRI Senior Chemist Pu T. Pahlira chuan ‘Tui thianghlim lo leh kan hriselna’ tih thupuia hmanga a paper buatsaih a sawi a, tui atanga natna inkaichhawn theih- santen, tuihri, kawthalo, khawsikpui ril lam natna, pumpui pan, naupang zeng, thluaka khawsikpui lut leh mitliam kai theih dan leh a dan theih dante a sawi a, heng bakah hian tui nihphunga thatlohna awm theih hrang hrang chipchiar takin a sawi bawk a ni.

Heng bakah hian zawhna leh chhanna hun pawimawh tak an hmang ho a, workshop a kal zawng zawngte hnenah tui tihthianghlimna hmanrua pek vek an ni bawk.