Mizorama High School hmasa ber, Government Mizo High School chu kumin hian kum 70 a tling a, vawiin khan hemi puala lawmna programme an School-a an buatsaih chu he School chhuak, Health Minister leh Aizawl North III bialtu MLA ni bawk Pu Lal Thanzara’n a hmanpui a ni.

Pu Lal Thanzara chuan Govt. Mizo High School chu sikul hlun leh hmingthang mai a ni lo a, Chanchin tha in a hrinchhuah, Missionary hmasa tena an din anih avangin he sikul atanga zirchhuak leh tuna zir mek te chu an vannei hle a ni, a ti a. Govt. Mizo High School chuan ram hruaitu hlun engemaw zat, kawng hrang hranga mi hlawhtling tam tak an chherchhuah tawh thusawiin tuna he sikul a kal mek zirlai naupang te chu sikul ti hming tha, mi hlawhtling ni tur leh ram leh hnam tan mi tangkai ni turin a chah a ni.

Health Minister chuan vawiina zirlaite hi naktuka ram hruaitu tur te in la ni dawn a, chuvangin kawng engkimah an nun uluk tura a duh thu leh, zuk leh hmuam, ruihtheih thil lakah fihlim a, sualna hrang hrang pumpelh a, mi hlawhtling leh mi chhawrtlak ni turin ka chah duh che u a ni, a ti bawk.

Sawrkar hna in mi zawng zawng a daih dawn loh thusawiin Pu Lal Thanzara chuan zirlaite chu tun atanga Mizoram pawna hna thawk thei tura rilru tipaukhauh a, zirna leh thiamna hrang hrang te tun atanga ngaihtuah tan turin a chah a. Sipai officer-ah leh Central Service hrang hranga Mizo an tlem tawh thusawiin zirlaite chu sipai hna hrang hrang leh Central Service lam ah an rilru pe a, tun atanga heng hna atana in buatsaih tan turin a fuih a ni.

Vawiina Govt. Mizo High School kum 70 tlin lawmna programme hi an Headmaster Pu Lalrammawia’n kaihruaiin inlawmna thuchah a sawi a, Pu P.Siamhranga’n hunserh a hmang bawk a ni.Vawiina programme hi Govt. Mizo High School Headmaster, Principal leh zirtirtu he sikul atanga pension mi engemaw zatin an hmanpui a ni.

Govt. Mizo High School hi kum 1944 khan Sap Missionary ten an din a, Headmaster hmasa ber chu Rev. J.M. Llyod a ni.