Vawiin khan Mizoram Sericulture Service Association chuan Sericulture Conference Hall, Chaltlang-ah an pawl Annual General Conference vawi 34-na an hmang a, Dr. B.D. Chakma, Sericulture Minister chuan khuallian niin he programme hi hmanpui a. Pu Lalrinawma, MSS, Secretary, Sericulture department chuan khual zahawm niin he programme hi a hmanpui bawk a ni.

Pu C. Hrangzawna, President MSSA Hqrs. kaihhruai inkhawmpui ah Minister Dr. B. D. Chakma chuan MSSA General Conference vawi 34 na hmang tura a tel theih avang leh Secretariat atanga official lo kal zawng zawng te leh Department a thawktute zawng zawng lungrual taka an thawh theih avangin lawmthu a sawi a. Sorkar hnathawkte chuan mahni dawhkan ah theuh, dik taka thawk tur leh rinawm taka thawk tura chahin Sorkar building, bungruate fel tak leh duat taka enkawl a tul thu a sawi bawk a. Sericulture department hnuaia pangngang khawitute eizawnna ngialnghet siamsak hna kawngah leh thiamna pek (technical training) kawngah te theihtawp chhuah a, tan la turin a fuih a ni.

Sericulture department thawktu zawng zawngte leh sericulture farmers te tlangnel tak leh inlaichinna tha zawk nen thawhho a tul thusawiin sericulture farmers te phur zawka an thawh theih nan tan lak a tul thu a sawi bawk. National Women Awardee 2014 New Delhi-ah Mizoram atangin mi 2 an tel ve chu lawmawm a tih thu leh heng atang hian hmeichhiate tan sericulture ah phurna nasa tak a pek a rin thu a sawi a.

Pu Lalrinawma pawhin thu sawiin thawhrimna avanga Department in hma a sawn nasat avangin hruaitute chungah lawmthu a sawi a. NLUP leh MGNREGA leh RKVY scheme hrang hrangah sericulture farmers an phur hle a, chuvangin a Department a thawk ten thahnemngai takin tan kan lak a ngai a ni a ti.

Chawhnu session ah Report pharhna te neiin rorel inkhawm an nei nghal bawk a ni.