Champhai District Football Association (CDFA)  buatsaih Mipa leh Hmeichhe naupang kum 6 atanga 12 inkar tana  Football zirna CDFA  Grassroots Football Training Course vawi 12 na chu vawiin chawhnu khan Chhangphut Field-ah Dr Lallawmkima, DIPRO Champhai chuan a hawng.

Hawnna hunah thusawiin Dr Lallawmkima chuan   thiam thil zir chak tak tak naupangte puala Football zirna hun hawn ani leh thei chu lawmawm a tih thu sawiin,  Champhai District chhunga Football hmasawnna thlentu Champhai District Football Association hnathawh chu fakawm a tih thu a sawi a.   Infiamna chu tunlai khawvelah eizawnna tlak anih thu leh Mizote zingah Footall khelh hmanga eizawng tam tak an chhuah tawh thu sawiin, infiamna huanga hlawhtlinna tluantling chang thei tur chuan mahni inthunun theihna, thuawihna leh taihmakna neih angai tel a ni, a ti a.  Grassroots Football Training atanga zirchhuak tawhten India rama Academy changtlung tak taka an awm chuan a hlawhtlinzia  a tarlang a ni, a ti a. Grassroots  Football Training Course-a inziaklut  naupangte chu zirna ngaipawimawh hmasa tura chahin, lehkhathiamna nen chuan thui zawk a thlen theih ani, a ti a.  Naupang Football zir turte chu theihtawp chhuaha district, state leh  ram tihmingthatu nih tum  tura chahin an kalzelna turah duhsakna a hlan nghal a ni.

Pu C.Hualrikhuma, President, CDFA chuan Naupangte chu  an Zirlai  te ngaipawimawh hmasa zawk tur leh chumi bakah chauh football zirna lam ngaihtuah turin a fuih a. An zirna hmunhmate neitu thinlung pu a enkawl leh tihfai kawnga tan la zel turin a chah a. India rama football a academy tha ten an rawn thlithlai hunah pawh an mittlung pha ngei tura theihtawp chhuah turin Naupangte a chah bawk. CDFA Honorary Secretary Pu K.Lalbulliana, NIS Coach  tunhnai maia Mizoram Under 14 Boys  team Subroto Cup-a  champion puitu leh Coach tha ber nihna hauhtu chu  CDFA in a  lawmpui thu leh a hnuaia training neih ani tur chu phurawm a tih thu a sawi bawk.

He hun hi Pu K.Lalremsiama ,  Grassroots  Development Officer chuan a kaihruai  a. Tun session bik atan hian naupang 75 te an inziaklut tawhin inziahluh zel theih a ni a. Training hi vawiin atanga tanin thla thum chhung Thawhtanni, Nilaini leh Zirtawpni apiangin Sikul ban hunah neih thin tur niin, Coach pathum ten a zirtir thin dawn a ni. CDFA Grassroots Training Course  atanga inzirchhhuak mi 10 te chuan  India rama Football Academy tha ber berte an zawm tawh a ni.