Mizoram in Remna leh Muanna ah neih kum 25 a tlin puala Exhibition buatsaih ‘Celebration of 25 Years of Peace – Cum – Exhibition’ chu vawiin chawhma khan New Secretariat Complex Ground-ah Chief Minister Pu Lal Thanhawla’n a hawng.

Ni li chung (January ni 24 – 27) awh tur Exhibition hawnna inkhawm Chief Secretary Pu Vanhela Pachuau kaihhruai-ah hian Chief Minister Pu Lal Thanhawla chuan kum sawmhnih chhung zet ram a buai hnu-a remna leh muanna Mizoramin ah neih dan tlangpui a tarlang a. Chief Minister chuan remna leh muanna boruak hnuaia kum sawmhnih panga chhung Mizoram in kawng hrang hranga hmasawnna a neih thu sawiin, hmasawnna tichak lehzual tur chuan remna leh muanna mitin an humhalh leh an humhim a pawimawh a ni a ti. Chief Minister chuan remna leh muanna man to taka lei hi rinawmna, taimakna, dikna leh Pathian tihna  nena vawnghim leh chawinung turin mipuite a chah bawk a ni.  

He hunah hian MNF Vice President Dr. R Lalthangliana; MPC President Pu L. Sailo; ZNP President Pu Lalduhawma leh BJP President Pu Lalhluna ten thusawina hun an nei bawk a ni. Hawnna inkhawmah hian Minister, Parliamentary Secretary leh MLA engemaw zat an tel a. An ni bakah hian Secretaries te, Department hrang hranga hotulu leh officer dangte an tel kim hle bawk a ni.

Exhibition ah hian Stall 135 a awm a. Heng Stall ah te hian Mizoram Sorkar hnuaia Department 22 ten hmasawnna hna an thawh leh an hmalakna te mipui en theih turin an phochhuak a. Anni bakah Sorkar laipui hnuaia Department 8, Sorkar hnuaia Public Sector Undertaking (PSU) 13 leh mimal sumdawng 92 ten Stall an siam bawk a ni.