201/2026-2027

Lawngtlai, 18th April 2026: Nimin khan Lai Autonomous District Council - a Chief Executive Member (CEM) Pu C. Lalsawmzuala leh Lawngtlai Bawrhsap Pu Donny Lalruatsanga te chuan Hruitezawl an tlawh a, khawtlang hruaituten an lo dawngsawng a ni. 

Pu C.Lalsawmzuala chuan khawtlang hruaituten an lo dawndawnaah lawmthu a sawi a. Chhimtuipui lui dunga Lawng chetvel dante, bungrua lut leh chhuakte chu Council sawrkarin awmzenei zawa kalpui a tum tih a sawi a. Thenawm ram Myanmar nena sumdawnna kal mekah inkhuahkhirhna tha leh mumal zawk kalpui chu thil pawimawh tak a ni tih tarlangin, ruahmanna felfai zawka siam a kalpui a ni ang a ti. Hruitezawl chu ramria awm an nih angin, kawng hrang hrangah fimkhur thiam a tul dawn hle tih sawiin, thahnem ngai taka ram leh hnam tana thawk turin a fuih a. Kawhtlang hruaitute leh sawrkar inkarah thawhhona tha tak a awm a tul hle tiin, CEM chuan thawhhona tha zawk awm turin thawhpuiah sawmin, mamawh an neihte ngaihsak a tum thu a sawi a ni. 

Pu Donny Lalruatsanga chuan Hruitezawl chu Myanmar nen insumdawn tawnna hmun a nih angin, dan lova ramdangmi luhna remchang a zau hle tih sawiin, heng lakah hian khawtlang hruaitute chu fimkhur turin a chah a.Tun dinhmunah Hruitezawlah Raltlan In 300 vel awmte pawh sawrkarin a hriatpui tih sawiin, thlitlhai reng an ni a ti a. An khawsak leh chetvelna kawngah dan kalh a awm leh awmloh chik chu a pawiwh hle tih sawiin, hemi kawngah hian khawtlang hruaituten theihtawp lo chhuahpui turin a sawm a. Pu Donny Lalruatsanga chuan khawtlangin mamawh an neih kawng hrang hrangah tanpui a inhuam reng thu a tarlang bawk a ni. 

Pu C. Lalsawmzuala leh Pu Donny Lalruatsanga te hian Hruitezawl chhaka khualzin te tlawh hlawh tak ' 'Bawinu' chu a hmunah kalin an tlawh nghal a. Khuanun a duan hmun mawi leh ropui tak mai Lawngtlai District leh Siaha District- in a nei chu District pahnih tan vanneihna a ni tih tarlangin, heng hmunte hi a nihdan tidanglam lo va, a tlawhtuten awmlsam zawka an tlawh theih dan turte, a hmun hma chei that leh hahchawlhna remchang zawk siam kawngah hmalak a nih tur thu an sawi a ni. 

Bawrhsap leh CEM te hi Pu David Lalrinawma, Additional DC, Pu David J. Byhnadaolai, Addl SP, Pu HC. Vanlalruatpuia, Transport Officer, LADC, Pu C. Lawmsangzuala, I&PRO, LADC bakah MJA Lawngtlai District hruaituten an tawiawm a ni.