202/2026-2027

Lunglei, 2026 Ṭau thla ni 18: Nimin khan Lunglei District Horticulture Officer (DHO) Pu Lalṭhakima hovin Horticulture-a thawktute chuan Lunglei District-a Thlengang ram Sihphir Zau (Tuipui kam)-a Pu Vanlalnghaka Sailo huan an tlawh a. Horticulture Department aṭanga thlai chi a dawn hmanga a hma laknate a hmunah an enpui. 

Pu Vanlalnghaka Sailo hian ṭin 6 hmunah fur zikhlum (Ryozeki) chingin, quintal 24 a seng tawh a. Kilogram-ah ₹20 zela hralhin, quintal 250 vel thar a inbeisei a. Tomato variety, Arka Samrat ṭin 2 hmunah ching bawkin, thla thar lamah seng ṭan a inbeisei a. Zorin bean ṭin 1 hmun neiin, badam ṭin 1 hmunah a ching bawk a. Badam hi ip (bag) 1-ah kg 40 zelin ip 15 tharin, kg-ah ₹100 hisapin a hralh a. Vaimim chi hnih – sweetcorn leh Korean vaimim ṭin 2 hmun ve ve siam bawkin, sweetcorn hi seng tawh ip 85 leh la seng loh ip 60 bawr vel, Korean vaimim hi seng tawh ip 19 leh seng loh ip 40 bawr vel a nei bawk a. Vaimim hi ip 1-ah kawm 90 zel awmin, kawm 7 hi ₹100-in an hralh ṭhin.

Pu Vanlalnghaka Sailo hi Horticulture Department leh Agriculture & Farmers' Welfare Department chuan thlai chi bakah, lei ṭha leh damdawi te pein, huan enkawlna hmanrua leh tui lakna hmanrua chi hrang hrangte an ngaihtuahpui ṭhin bawk a. Thlai chin leh enkawl chungchangah te, thar chhuah deh ralna kawngah te pawh a ṭul anga kaihhruaina (technical support) nen an vil zui reng bawk.

Lunglei District Horticulture hotute chuan Pu Vanlalnghaka Sailo huan bakah hian Thlenganga Sihmual Zauva chhungkaw 26 te hma lakna an enpui bawk a. An mamawh leh harsatna te ngaithlain, Department aṭanga ṭanpuina leh kaihhruaina awm thei ang angte nen theih tawpa hma lak ho zel an tum a ni.

Attachment

  • Loading attachment...