Mizo thalai ten cement mistiri hna an thiam theih nana Sub - Headquarter YMA Kolasib buatsaih Cement Mistiri training chu vawiin khan Taitesena Hall, Kolasib-ah Pu H.Rohluna, Minister Industries etc. in a khar.

Kharna inkhawmah hian Pu H.Rohluna chuan ram leh hnam humhalh nan thalaite thiamna tihhriam a, intodelh hi kawng pawimawh ber pakhat a ni tih sawiin, hemi kawnga sorkar leh YMA te hmalakna chu fakawm a tih thu a sawi a. Sorkarin thalaite thiamna tihhmasawnna atan school a zirna mai duhtawk lovin skill development training a buatsaih zel a, thalai tam tak chhawrtlak an chhuah tawh thu a sawi a. In sak na reng rengah hnamdang kan chhawr hnem a, mizo thalai hna mumal neilo tam tak ten cement mistiri hna thawk thei tura thiamna an nei ve ta chu lawmawm a tih thu sawiin, hei hian hnamdang kan chhawr thin a tihtlem a beisei thu a sawi. Training chhuak te an thiamna tipung zawng a tan la tur te, taima taka thawk tur te leh kuthnu mam taka thawk turin a chah a, a chhawrtute rinngam leh mittlung taka thawk turin a chah a ni.

He hunah hian Pu K.Lianzuala, KVI Board Chairman chu khualzahawm a ni. Cement Mistiri training hi thla khat chhung buatsaih a ni a, 1st November, 2016 khan hawn niin a tira inziaklut hi 100 an ni a, a tawp thlenga training hi mi 80 an ni.