Vawiin chawhma khan Lunglei BDO Conference Hall-ah YMA, LE & IT Department leh Mizoram Building and Other Construction Workers’ Welfare Board te bultuma November ni 1 atanga Cement Mistiri Training buatsaih chu kharna hun hman a ni a. Lunglei DC Pi Lalzarmawii, IAS chu Khuallian niin a hmanpui.

Pi Lalzarmawii chuan kan Mizo pui Cement Mistiri ngei te sak Biak Inah Mizo Kristiante kan inkhawm chak tawh a ni, a ti a. Heng hna kan thawh peih phawt chuan YMA thupui ram leh hnam humhalh hi tih hlawhtlinin a awm anga, sum tam tak ramdanga luangral tawh lovin kan ram than nan kan hmang thei tawh dawn a ni, a ti. Mizo te hi mi hmanhmawh kan ni tiin, Mizoten kan Mizo pui ngei kan ruai duh theihna tur chuan mahni inphah hnuaia, min chhawrtu te duhdan kan ngaihchan thiam a ngai a ni, a ti. Hnamdang Cement Mistiri te neih ve loh, theory class an nei chu an vannei hle a ni a ti a, thiam a belhchhah in a titlo dawn a ni, a ti. Kan hnam dinchhuah nan kan pawimawh theuh a, thawh hreh nei lo ila, thawk zel bawk ang u, a ti.

Lunglei ITI Principal Pu Vanlalhruaia Sailo pawhin thiamna kan in zirtir rual hian, kan rilru sukthlek kan thlak a ngai a ti a. Min chhawrtu te duhdan ngaihchan hmasak a, thawh hona tha kan neih a tul a, insakna bungrua leh hun te renchem nachang kan zir a ngai a ni, a ti. National Skills Qualification Framework (NSQF)-in a tum thenkhatte a tarlang bawk a ni.

Pu R. Lalnunthara, President, YMA Sub-Hqrs, Lunglei chuan training chhuakte chu an thiamna theihnghilh theih tawh loh tur chu vawng nung zel a, hmasawn zel tur leh an thiamna tipung a, midang zirtir chhawng turin a chah a ni.

He kharna inkhawm hi Pu Ngurthansanga Sailo, Finance Secretary, YMA Sub-Hqrs, Lunglei in a kaihruai a. Pu R. Lalnghakliana, Asst. Secretary, YMA Sub-Hqrs, Lunglei in report a pe a, mi 85 training an awm tiin, Coordinator 2 leh Instructor 3 an awm bawk a ni. December ni 1 & 2 hian Trainee te tan theory exam buatsaih a ni dawn a ni.