NABARD, Mizoram Regional office chuan tun hnaiah Mizoram state tan Rural Infrastructure Development Fund (RIDF-XXII) hnuaiah loan cheng nuai 9595.71 a sanction a. Aizawl, Mamit, Lunglei leh Champhai District a thingtlang khaw inkalpawhna kawng 4 leh Lei (Bridge) 4, a thar leh a hlui siamthatna atan hman tur a ni. Heng Project zawng zawng atana sum mamawh chu cheng nuai 10811.00 a ni a. NABARD Loan sanction bak hi chu Mizoram Sorkar in a tum ang.

He project in a huamte chu cheng nuai 1784.40 senna tur Hualngohmun leh Samtlang inkal pawhna kawngpui thar 4.2 Km a sei te; Thuampui South atanga Sertlangpui Khaw kalkawng siam that na tur cheng nuai 3048.33 te; Ngopa leh Mimbung inkar kawng tihzau leh thuamthatna tur cheng nuai 1800.00 te; Ramrikawn atanga PTC Kawng, NH-54 kawngpui pawhna kawng siam thatna tur cheng nuai 931.87 te; Peka Lui, Build-Up-Steel Girder Lei (Bridge) dawh na tur cheng nuai 400 te; Saitual leh Phullen inkar kawnga Tuivawl Lui chung Double Lane Build-up-steel Girder Lei (Bridge) dawhna tur cheng nuai 928 te; Bairabi- Zamuang kawng ah R.Teirei chunga Build-Up-Steel Girder Lei (Bridge) dawhna tur cheng nuai 1365.60 te; Khedacherra - Damcherra - Zamuang – Kawrtethawveng – Tuilutkawn kawnga R. Chengkawl Luia Lei (Build-Up-Steel Girder Bridge) dawhna tur cheng nuai 552.80 te a tel a ni.

Kawngpui thar sial, siam leh thuam that bakah Lei (Bridge) dawhte hi kum 2020, March ni 31hma a zawh fel hman tura ruahman a ni a. He project hi thawh zawh a nih hunah chuan khaw 70 zetin an tangkaipui dawn a, thingtlang mipui 71,300 te tan ei leh barah hmasawnna a thlen ngei beisei a ni. Thingtlang khaw kilkhawr ber thlengin inkalpawhna a tih awlsam phah ang a, buh leh thlai thar chhuah te pawh kumtluanin awlsam taka hralh chhuah theih a nih dawn bakah thar chhuah pawh a pun phah beisei a ni a. Hospital, School leh hmun dang te pawh awlsam zawkin a in kal pawh zung zung theih phah dawn bawk a ni.