Vawiin chhun dar 12:00 khan District Research Office, Venghlui-ah Census of Govt. Employees & Workers, Aizawl District 2015 bu chu Pu R. Lalrammawia, President, Federation of Gov’t. Employees & Workers (FMGE&W) chuan a tlangzarh.

Lehkhabu tlangzarhtu Pu R. Lalrammawia chuan Mizoram Sawrkar hnathawkte dinhmun sawiin tunhma lam atanga platform chi hrang hrang atanga mipuite laka sawrkar hnathawkte hmai tihmawk tuma thu belhchian dawl vak lo a chirh theh an nih thin dante a sawi a. Mizoram sawrkar department hrang hrang hnathawhte tarlangin, hengte hi Zoram mipui tan leh kan ram hmasawnna atana thawk an nih dan a sawifiah a. Department hrang hranga thawkten chhun zan zawma an thawh lai leh a thenin ram mipuite himna atana nunna hial chana an thawh laia sawiselna leh vauna dawn leh ringawt hian mihring a siam tha lo a. Sawrkar hnathawkte hnathawh hriatpui a, an tlin lohna laiah te dawm kang a, fuih an ngaihna laiah te fuih thin ni ta zawk se a duh thu a sawi a.

Mizoram sawrkar hnathawkte service leh pay chungchangah state dangte leh Central sawrkar hnathawkte aia tha chung chuang bika sawi a ni fo thin hi a dik loh dan sawifiahin Pu Lalrammawia chuan a sumfai a hlawh pekah phei chuan Mizoram sawrkar hnathawkte hian Central leh State danga an anpuite an phak loh thu leh pay rules in a phalsak ang hrang hrang tun thlenga revise a la nih loh thu a sawi bawk. Hetiang a nih laia pay tha chung chuang, state dang leh central hnathawkte aia service condition tha zawka sawi a ni thin hi a rilru nat thlak a, hetiang dinhmunah hian sawrkar hnathawkte hi awm mahse FMGE&W chuan taima tak leh rinawm taka ram leh hnam tana thawk zel turin an member te an fuih tlat thin dan te a sawi bawk a ni.

He lehkhabu hi Economics & Statistic Department buatsaih a niin, Aizawl District bika Mizoram Sawrkar hnathawkte chhiarpui an neih hnu-ah, kawng hmang nei taka remkhawmna lehkhabu a ni a. Mipui nawlpui, a bik takin sawrkar hnathawkte, Research beitute leh zirlaite tan tangkai hle tura ngaih a ni.

Tlangzarhna hun hi Pi Rothangpuii, DRO, Aizawl District-in a kaihruai a. He lehkhabu buatsaih a nih dan report kimchang Pu J. Ramdinmawia, Sub Inspector-in a pe a, Pu Saithanzuala, Dy. Director-in thusawina a neih hnu-in Pu F. Lalbuaia, Inspector in lawmthu sawiin hun a khar a ni.