Dr. S. Ayyappan, Secretary, Deptt. Of Agricultural Research & Education, ICAR Director General ni bawk chuan Inrinni March 29 khan Mizoram tlawhin Kolasib-a ICAR Centre-ah ICAR, KVK leh Mizoram sawrkara Line Department hrang hrang hotute hmaah thu a sawi a. Mizoram chhungah hian Buh leh thlai chin leh thar chhuah kawngah hmabak eng tak a awm a ni, a ti.

Dr. Ayyappan hi Lengpui Airport ah Agriculture Deptt. hotuten anlo hmuah hnuin Kolasib panpui nghal a ni a. Kolasib Vengthar-a KVK leh ICAR hmuna office leh laboratory hrang hrangte, Scientists rualin buh leh thlai chin kawnga research an beihna hmun te chipchiar taka a fan hnuin tlai dar 5: 30-ah Hall ah inkhawm neihzui a ni.

Dr. Ayyappan chuan Mizoram chu buh leh thlai chin bakah ran vulh kawngah te, sangha khawi ahte a thang duang hle a ni, a ti a. Scientist te kawhhmuhna atanga thiamna hmanga hna thawhah pawh hma a sawn takzet a ni, a ti a. India ram pum ang pawhin Agricultura-ah boruak a inlumlet nasa in kan thar chhuahin hma a sawn nasa a, kum kalta khan buh leh bal 263 million tons kan thar chhuak a ni, a ti a. Kut hnathawktute thawhrimna chu thil hlu tak a ni tih pawh sawiin hei hian ram economy pawh a siam a ni, a ti bawk.

Department Mithiam leh Godrej Company hotuten an ngenna chhangin Oil Palm, Sangha leh buh leh thlai chi hrang hrang chin kawnga tihdan kawh hmuh thin turin India rama mi thiam Scientists te a inchhawkin ICAR Centre ah hian an rawn duty thin ang, Dr. Ayyappan chuan a ti a ni.

He hunah hian Pu SB Singh, Jt. Director, ICAR, Kolasib bakah Pu H. Lalthanpuia, Director, Agriculture (R&E), Pu R. Zotawna, Director, Horticulture te pawhin thu sawiin Mizoram tana mamawhte an thlen a. Deptt. hrang hrang hotute, ICAR Scientists te leh AMFU hotute hetah hian an tel bawk a ni.

Dr.Ayyappan hian hemi ni vek hian Mizoram a chhuahsan nghal a ni.