Vawiin khan Central Jailah AIKO te hmalakna in Advance Christmas hman a ni a. Health Minister Pu Lal Thanzara’n a hmanpui.
Jail, Tan In kan tih hi inhremna hmun a ni lova, Sorkar in insiamthatna tur hmun a tana a ruahman a nih thu khuallian Pu Lal Thanzara chuan sawiin sual vang reng nilo, vanduai vang leh ngaihtuahna hman fimkhur tawk loh avangte in Jail bang zut theih te pawh a ni a, hringnunah hian beidawn lutuk tur ani lova, Mitin hian tih theih leh thiam zawng talent neih a ni a, chu chu a tha zawnga hman a tul hle a, englai pawha min hmangaihtu leh kawng min hrilhtu, kan sualte ngaidama kan thlarau nun chhandamtu Isua Krista neitu nih hi a pawimawh in vawn reng a ngaihthu a sawi.
Chhandamtu pian thla - December ah hian naupiang chibai buk leh hmuah dan a in anglo hle a, mahni lawmzawng leh a behbawma buai luat avanga hmuah tur leh chibai buk tur ber ngaihsak lova khawvel thil lama buai mai a awl zia sawiin Minister chuan tuna Jail tang mek te erawh chu pawnlam tihbuai lohna hmunah, thinlung alama hawiin rilru leh thinlung takin chhandamtu an hmuak thei dawn a ni, a ti a. Thu awihna nen chauh Pathian nen a intawn theih a, Jail Run thim pawh Pathian thlarau hnathawhin Jail Run Eng a chang thei a, thinlung hawnga Pathian chibai buk tura ngen in duhsakna a hlan a, Jail tang ten Christmas hlim taka an hman na turin pawisa a pe a ni.
Pi C. Lalchhuanthangi, General Secretary, AIKO kaihhruai vawiin programme ah hian Rev. Lalzuithanga, Ex-Moderator, Mizoram Synod chuan ‘Kei pawhin thiam loh ka chantir lo che, Kal la, tisual leh tawh suh’ tih thupui hmangin thuchah nung tak a sawi a. Pu K. Lawmthanga, DIG, Prison Department leh Central YMA hruaitu Pu Lalhmachhuana pawh in thu a sawi a, zaithiam zai te ngaihthlak a niin AIKO hian tang te hnenah thilpek hrang hrang an pe bawk ani.
AIKO hi NGO niin hmeichhia leh naupang humhalhna lamah te hma an thin a, kum 2010 khan Mizoramah din a ni ve tan a, a hming AIKO hi Japan ho tawng atanga lak a niin a awmzia chu Hmangaihna tih lam hawi a ni. Pawngsual tawk, domestic violence tuarte an tanpui thin a. Legal awareness campaign Mizoram hmun hrang hrang ah te an nei thin a. Mizoram State Legal Services Authority hnuaiah Para-legal volunteer an awm bawk a, Central YMA hnuaiah SRS ah counseling te an pe thin bawk. Rev Zairema Building Zarkawtah Office an nei a ni.
