2293/2022-2023
Lunglei the 12th October, 2022- Tui hna humhalh leh ruahtui khawl chungchanga Sawrkar Laipui hmalakna JAL SHAKTI ABHIYAN: CATCH THE RAIN 2022 a Central Nodal Officer Shri Pawan Kumar, Director, Ministry of Minority Affairs, Govt of India leh Central Technical Officer Shri Jeeta Ram, Deputy Director, Central Water Commission (CWC), Ministry of Jal Shakti, Govt of India te chuan Lunglei District-a hmalakna an rawn enfiah a ni.

Hemi chungchangah hian vawiin chawhma khan Lunglei DC Conference Hall-ah meeting neih a ni a. Central Nodal Officer te bakah Lunglei DC Pu Kulothungan A hovin a kaihhnawih Department – PHED, DRDO, Irrigation & Water Resources, EF&CC, Fisheries, Agriculture leh NEIDA hotute an tel a ni.

He hunah hian Jal Shakti Abhiyan District Nodal Officer Er Zodingpuia, SDO, PHED chuan Powerpoint Presentation hmangin Lunglei District-a hmalakna a sawi fiah a.

Lunglei District huam chhunga lui, tuikhur, dil te leh water body dang awm zawng zawngte GIS Mapping kaltlanga chhinchhiah in, Line Department-te water body database mumal tak neih tawh a ni a. Tui chungchang zirna hmunpui ‘Jal Shakti Kendra’ chu PHED Rural Watsan Lunglei Office-ah ruahman niin tui hna humhalh leh ruahtui khawl chungchangah a duh apiang tan rawn theih rengin an awm a ni.

Jal Shakti Abhiyan thiltum te ti hlawhtling turin Line Department hrang hrangte Project tha taka kalkawp tir anih theihnan ‘District Level Convergence Committee for Jal Shakti Abhiyan’ din niin Department-te an thawkho a ni.

HPC Lunglei kaltlanga hmalakna, ruahtui dah khawl leh tuikhur siam that project ‘HPC WATER STORAGE PILOT PROJECT’ hnuaiah cheng nuai 100 sengin kumin khan Lunglei khawpui chhung hmun parukah (6) ruahtui dah khawlna (Demountable Tanky for rainwater harvesting) leh kangmei chhuah thulha hman tur tui dah khawlna pahnih (2) ruahman a nih bakah, tuikhur pariat (8) chei that an ni. Rural Development Department hmalaknain Lunglei District hmun 45-ah tui hna humhalhna Amrit Sarovar project kalpui tawh niin hmun 30 dangah kalpui leh a ni ang.

JAL SHAKTI ABHIYAN: CATCH THE RAIN 2022 hnuaia tui hna humhalh leh ruahtui khawl pawimawh chungchang zirtirna Awareness Campaign hi Lunglei District khaw hrang hrangah North East Initiative Development Agency (NEIDA) ten an kalpui thin bawk a ni.

Central Nodal Officer-te hian Lunglei District hmalakna tha an tih thu leh hmachhawp la awm te pawh tha taka lo kalpui chhunzawm zel turin an chah a. Jal Shakti Abhiyan hi project dangte nena convergence a kalkawp tir turin Line Department Official te chu an chah a. Meeting neih zawh hnu hian Lunglei khawpui leh a chhehvela hmalakna hrang hrang a hmunah kalin an enfiah a ni.

Lunglei District-ah ni thum chhung cham tura beisei an ni.

Jal Shakti Abhiyan hi Sawrkar Laipui Ministry of Jal Shakti hnuaia hmalakna niin kum 2019 ah bultan a ni a. He hmalakna in a tum ber chu tui hna humhalh leh ruahtui khawl lama hmalak leh a pawimawhna te mipui zirtir a ni.