2292/2022-2023
Aizawl 12th October 2022: Vawiin khan Govt Hrangbana College Golden Hall-ah Tourism Minister Pu Robert Romawia Royte chuan 'Yuva Tourism Club' a hawng a. India sorkarin thalai leh zirlaiten Tourism kaihhnawih thil hrang hrangah an tel tam a, 'Sustainable & Responsible Tourism' chungchang an hriatna tur atana zirna in zawng zawngah 'Yuva Tourism Club' hawn vek tur a tih angin, Mizorama HS, HSS leh Collegiate Institution hrang hrangten an siam chho mek a ni. Mizoram Tourism Industry-ah pawh heng Yuva Club-te hi tangkai taka hman zel tum a ni.

Govt Hrangbana College-a Yuva Tourism Club hawngtu Tourism Minister Pu Robert Romawia Royte chuan thusawiin Central Sorkarin tourism beihpui thlakna kawngah Zirna in hrang hrangte an pawimawh tih hriain Yuva Tourism Club din vek turin state tinte a hriattir a, chumi bawhzui chuan Higher Education leh School Education Department-te nen sawihovin Yuva Tourism Club din hi rel a ni tih a sawi a. Govt.Hrangbana College-in Yuva Tourism Club rang taka an din theih chu a lawmawm hle a ni a ti. Mizoram sorkar chuan Covid hripui karah pawh chawl lovin Tourism policy leh dan tulte a duang fel vek tawh a, infrastructure lamah pawh hma nasa taka lain Chite Convention Centre pawh Rs. 4000 lakh chuang sengin sak mek a nih thu leh Beraw Tourist Resorts pawh tihchangtlun zel niin, Mawma Tlang te pawh khualzin tam zawk tlawh tura chei a nih tur thu a sawi.

Tourism Minister Pu Robert Romawia Royte chuan Tourism Project lian tham PRASAD scheme atang leh EAP atanga sanction hmuh thuai an beisei thu a sawi bawk. Minister chuan kan hma lawka awm tur Anthurium Festival leh Mizoramin a vawi khatna atan November thlaa 'International Tourism Mart 2022' a thlen turah mipui zawng zawng tel vek turin a sawm nghal a ni.

Govt. Hrangbana College Principal, Pu Lalrochuanga Pachuau pawhin thu sawiin Yuva Tourism Club hnuaiah chak taka hmalak a ni a, he club hnuaiah hian zirlaiten Tourism lama ngaihtuahna zau zawk an neih a, eizawnna kawng tha zawkte pawh an neih theih ngei a beisei thu te a sawi a. College dinhmun sawiin zirlai tha tak tak leh zirtirtute inpekna avanga tun thlenga result tha an nei zel chu chhunzawm zel an tum thu te, zirna piah lamah zirlaite hmasawnna turin kawng hrang hranga hmalak a nih thu a sawi bawk.

Yuva Tourism Club hawnnaah hian Tourism Department Director Pu Saitluanga, Deputy Secretary Pi Zonunthari te bakah zirtirtu leh zirlai thahnem tak an tel a, Tourism department buatsaih Responsible Tourism pledge thutiam an tiam rual bawk.

Yuva Tourism Club hi Ministry of Tourism, Government of India hnuaiah zirna in hrang hranga din tura ruahman siam a ni a. Hemi bawhzui hian Mizoram Tourism department chuan Mizoram chhunga zirna in hrang hrangah Yuva Tourism Club din tur hian hriattirna a chhuah tawh bawk. Govt. Hrangbana College hi Mizoram chhunga mumal taka club hawn hmasak ber a ni a, tun dinhmunah hian he club hnuaiah hian zirlai 200 chuang an inziaklut tawh a ni.