Staff Selection Commission (SSC) leh Mizoram Sawrkar DP&AR tangkawp chuan vawiin khan Vanapa Hall ah University, College leh Higher Secondary School naupang te tan Central Sawrkar hnuaia Staff Selection Commission kaltlanga hna hrang hrang kum tina exam theih te inzirtirna hun ‘Awareness Campaign on Job Opportunities’ an buatsaih.
He Awareness Campaign hi Prime Minister’s Office thupek bawhzuia buatsaih niin SSC hnuaia hna lakna hrang hrangah hmarchhak state atanga tling an tlem thin avanga tih a ni a, thalai tam zawk ten exam tur hrang hrang te an lo hriata mi tam zawk an tlin theih nana ruahman a ni.
He programme hi SSC Chairman Pu A.Bhattacharya, IAS-in a rawn hmanpui a, ani bakah hian Sawrkar Laipuia Department of Personnel & Training-a Director Pi G.Jayanthi te, NEC Adviser Pu M.Iboyaima Meitei leh SSC (North Eastern Region) Regional Director Pi Debolina Thakur ten he hun hi an rawn hmanpui bawk a ni.
Mizoram Sawrkar aiawhin Pu Arun Goyal, IAS, Principal Secretary, DP&AR chuan inlawmna thu a sawi a, SSC-in Mizorama thalaite tana hetiang programme pawimawh tak a rawn buatsaih chu lawmawm tiin Mizo thalaite tan pawh Central Sawrkar hnuaia hna zawn kawngah nasa takin hmasawnna a thlen ngei a beisei thu a sawi.
He Awareness Campaign ah hian Pi Debolina Thakur chuan powerpoint presentation hmangin SSC kaltlanga hna hmuh theih hrang hrang te a tarlang a, heng hna dil thei tura thiamna ngai te, exam tura inbuatsaih dan tur zirlai te a zirtir a, zawhna leh chhanna hun pawh hman zui nghal a ni a, zirlai kal ten an hlawkpui hle a ni.
