Pu John Rotluangliana, FCS&CA, Transport etc. Minister chuan January 21st- 24th chhung khan a bial chhung khaw hrang hrang fangin, bial mipuite kawm na hun a nei.

Minister chuan ni li chhung hian a bial chhung khaw hrang hrang: W.Phaileng, Tuirum, Khawhnai, Teirei, Damparengpui, Tuipuibari, Rajiv Nagar, Andermanik, Khantlang, Rawpuichhip leh Lengpui te tlawh kualin, mipui nena inkawmna hun a nei a. Tuipuibari a PHC leh Rest House sak mek te leh Damparengpui a VC Hall sak zawh tawh te a hmunah a enfiah bawk.

Heng a zinkualna hrang hrangah hian Minister chuan sorkar hmalakna thar te leh buhfai leh gas man chungchanga mipuite hriatthiam loh deuh lai awm theite sawifiahin, sorkar hmalak mekna NLUP chungchangte a sawi bawk. Minister chuan PAHAL-Direct Benefit TRansfer for LPG (DBTL) Consumers Scheme chungchang sawifiahin, sorkar laipui a Petroleum & Natural Gas Ministry duh dan angin eirawngbawlna gas a man tlawma lei duh zawng zawng te chu he scheme zawm tur leh March 2015 hma ngei a Bank Account te hawng a tihfel ngai leh thehluh ngaite ti fel vek turin mipuite a chah a. Buhfai man chungchangah pawh Minister chuan kum 2002 atang khan FCI chuan buhfai man hi tum ruk ngawt a san tawh a, FCI atanga leina hnuhnung ber hi quintal khatah Rs.2981 a ni a, tuna kg. 1 Rs.15 a ni chung hian sorkar chuan mipui tana subsidy a pek chu Rs.10.75 a la ni a ti bawk. Minister chuan a bial chhung mipuite chu an ram neih that hmang tangkaia ei leh bara Mizoram chawm thei tura tan la tura chahin, taima taka hma laa tanpuina sorkar atanga an dawn te a hmanna tur diktaka hmang thin turin a chah a ni.

Minister hi Mamit District chhunga official pawimawh ten an tawiawm a ni.