Election Commission of India (ECI) din champhaa kum tina hman thin National Voters’ Day chu vawiin chawhnu dar 2:00 khan Vanapa Hall ah hman a ni.
Khuallian Pi Manisha Saxena, IAS, Chief Electoral Officer, Mizoram chuan thusawiin kumin National Voters’ Day ni 25 January chu chawlhni a nih avangin ECI chuan Mizoram tan a hma ni 24 January ah hman min rawn phalsak thu a sawifiah a. Kum 1950-a ECI din a nih atanga vawiin thleng kum 60 chhunga khawvela mipui rorelna siam nana inthlanna lian ber ECI chuan tluang taka a kalpui chhoh tawh dan te tarlangin khawvel mithmuh ah pawh chhuanawm a tlin dan te a tarlang a, India ram chu khawvela mipui rorelna democracy lian ber leh hlawhtling ber a ni, a ti. India ram zau taka inthlanna hlawhlting tak neih a nih theihna chhan chu mipui, officials leh mawhphurtu te thawhrimna leh thawhhona that vang a ni tiin CEO chuan National Voters’ Day chu a hminga hmang satliah mai lova, ram rorelna tha siam tura khua leh tui te mawhphurhna pawimawhzia inhrilhhriat nana hman a nih thin dan te a sawifiah bawk. Special Summary Revision of Electoral Rolls neih zawh hlimah kum tling thar 15,930 thun thar niin 6,142 siamthat a nih thu a tarlang a, kum tling thara EPIC nei thar te chu lawmpuina thu sawiin ram inrelbawlnaa an mawhphurhna pawimawhna hriaa vote tha taka thlak thin turin a chah bawk.
National Voters’ Day hmanna ah hian Chief Election Commissioner Pu H.S.Brahma thuchah chhiarchhuah a ni a, CEC chuan India khua leh tui tin te chanvo leh mawhphurhna inhrilhhriat nan National Voters Day hman a nih thin dan te sawiin kumin NVD thupuia Electoral Roll siamthat leh inthun thar te awlsam zawka kalpui a nih tur thu te a sawi lang a. Kum 2014 Lok Sabha inthlanna kha khawvela inthlanna lian ber niin vaibelchhia 55 aia tam leh hmeichhia vaibelchhia 26 zetin vote an thlak thu a tarlang bawk. Aizawl-a National Voters’ Day hmanna ah hian Jt. CEO Pu F.J.Liantluanga leh MPF President Rev Lalrinmawia ten thu an sawi bawk a, sorkar officials, political party leh NGO aiawh leh school naupang te an tel a ni. Hengte hnenah hian lawmman hlan an ni bawk a, kum tling thar mi 10 hnenah EPIC hlan an ni bawk.
1. Best BLO of Aizawl District - Pi Rosangzuali, Mission Veng -II
2. 2014 Lok Sabha inthlannaa vote tlak thatna ber District - Serchhip
3. 2014 Lok Sabha inthlannaa vote tlak thatna ber Assembly Constituency - Hrangturzo
4. Special Summary Revision 2015-a E.Roll-a ziah luh thar tamna ber Assembly Constituency - Palak
