Vawiin khan LAD Conference Hall, Mamit ah 5th National Voters’ Day hman a ni a, Pu K. Lalthawmmawia, District Election Officer, Mamit chuan khuallian ni a hmanpuiin, Vote nei thar te EPIC hlanna a nei nghal bawk. District Election Officer chuan India ram hi khawvela democracy ram lian ber a ni a, India ram ropuina ber pawh Democracy ram kan nihna hi a ni a, Vote nei thar te leh nei mek tena kan chanvo kan hriat thar lehzualna tura National Voters Day hman thin a nih thu sawiin, Vote nei thar te chu ram inrelbawlna ah chanvo kan nei ve in kan tel ve phak ta a ni tih in hre turin a fuih a. Vote nei thar te leh nei mekte chu ‘Vote neih hi kan chanvo a ni a, vote thlak kan mawhphurhna a ni’ tih hre thar theuh turin a sawm a ni.

Vawiin National Voters Day hmanna hunah hian Pi Lalbiaksangi, Addl DC in Chief Election Commissioner thuchah a chhiar chhuak a, a kaihhruainain National Voters’ Day thutiam kalkhawm ten sawirualna an nei bawk.

Mamit District ah Assembly Constituency pathum awmin Vote nei thar mi 2751 an awm a, an zingah hianin mi 1883 chu kum 18 tling thar te an ni. Vote nei zawng zawng hi mi 59991 an ni a, Bru Transit Camp ah Voters mi 8620 an awm mek a ni. National Voters Day Puala inkhawm hi Pu Malsawmtluanga, Election Officer in kaihhruai a, National Voters’ Day hi January 25 a hman thin nimahse Election Commission phalsak angin Vawiin ni 24. January a hman a nih thu a sawiin kum 2014 chhunga an hnathawh dan hrang hrang te a tarlang a. Mamit District chhunga BLO titha mi pathum Lalrinmawia Zamuang, 1- Hachhek, Beiseia Ngente , 2- Dampa leh V.L Ruata Sailo, 3- Mamit te hnenah khuallian in chawimawina thuziak leh pawisa fai hlanna a nei bawk a ni.