Mizoram hmun dangte rualin vawiin khan Champhaiah District Election Officer leh DC ni bawk Pu Sangdingliana hovin Champhai DC Conference Hall-ah National Voters' Day hman a ni a. He ni puala thutiam buatsaih sawi rualna hun leh BLO tithate hnena lawmpuina hlan leh EPIC semna te neih a ni bawk.
DC Pu Sangdingliana chuan kum tling tawh vote thlak theite tan electoral roll a hming chuang turin hmalak zel tur anih thu sawiin, inziahluh nachang hrelo leh buaipui dan thiamlo a awm theih avangin vawiin a kal te chuan mawhphurhna an neih thu a sawi a. Electoral Roll-a hming ziahluh mai bakah vote thlak ngei tura inhrilhhriat a tul thu sawiin, democracy tha siam turin leh inthlanna felfai leh thianghlim nei thin tur chuan mitinin kan mawhphurhna hlen a, vote kan thlak a pawimawh a ni, a ti.
Khuallian chuan BLO titha panga thlanchhuahte hnenah chawimawina thuziak (citation) a sem nghal bakah kum tlingtharte hnenah PVC EPIC a sem a. Vawiin hun hi Pu Benjamin Lalzama, Election Officer chuan kaihruaiin, Pu Zoremthara Ralte, AERO leh Champhai BDO ni bawk chuan National Voters' Day puala Chief Election Commissioner thuchah a chhiarchhuak a. Pi Lalrinchhani Ralte, SDC chuan National Voters' Day thuthiam sawi rualna kaihruaiin, Pi Lalhruitluangi, SDC hnen atangin SVEEP chungchanga inzirtirna ngaihthlak a ni bawk.
Vawiin huna thu sawitu dang Pu CC Lalchhuangkima, ERO leh Project Director, DRDA ni bawk chuan kum tling tharte chu mahni chhia leh tha hriatna hmanga ngaihtuahna mumal tak nei rual an nih tawh avangin inthlan hunah pawh midang duh dan nilovin mahni duh dan ngeiin vote thlak thin turin kalkhawmte chu a chah a. Electoral Roll revision a BLO-ten an tih turte tha taka an hlenchhuah avangin lawmthu a sawi bawk a ni.
Champhai District-a Assembly Constituency pangaah hian vote thlak thei mi 79,550 an awm a. Hmeichhe voter hi 39,940 awmin, mipa voter aiin 330-in an tam a ni. Vawiin a BLO titha thlanchhuahte hi Pu Ramfangliana, Teacher, Khawkawn M/S; Pu F. Khawlkunga , Headmaster, Lungvar P/S; F. Lalramliana, Headmaster, Hmunhmeltha M/S; C.Thangvuka, Teacher, R. Hranga H/S leh F. Lalramliana, Headmaster, Zawlsei M/S-te an ni.
