1583/2025-2026

Dated Aizawl, 24th September 2025: Vawiin khan Administrative Training Institute (ATI) buatsahin, 145th Level-D Training, State Attachment Programme-a lokal, Central Secretariat Service - Section Officer mi 22-te chuan Information, Public Relations, Printing & Stationery Secretary Pi Betsy Zothanpari Sailo chu a Office Chamberah an kawm. CSS Officer-te hi Pi Lalrimawii, Joint Director (Trg) bakah State Attachment Programme Course Coordinator Pu B. Tlangdingliana, Asst. Director (Trg) leh Lalbiakenga, Deputy Director, ATI ten an ho a ni.

IPR & PS Secretary Pi Betsy Zothanpari Sailo chuan Central Secretariat Service-a Section Officer-te chu Officer pawimawh tak an nih thu leh Mizoram pawhin kan dawr fo, dinhmun pawimawh tak chelhtu an nih avangin State proposal lo en fel kawngah leh an hnathawhnaahte tang sauh sauh turin a fuih a, Mizoram State Officer-te nen inkungkaihna tha tak an neih zel a beisei thu a sawi.

Course Coordinator Pu B. Tlangdingliana chuan he training hi New Delhi ISTM bul tum a nih thu sawiin Section Officer-te hi Under Secretary an kaisanna tura State Attachment Programme, ni 12 chhung nei an nih thu te, Attachment senso hi an thawhna Ministry/Department hrang hrang ten an tumsak a nih thu a sawi bawk.

He State Attachment Training Programme hi ni 12 awh tur niin September ni 26-ah Delhi-ah an haw leh dawn a ni. Mizorama an cham chhung hian Department hrang hrang – School Education, Women & Child Development leh MSD&RB Officer-te an tlawh a, Block attachment programme-ah Aibawk, Tlangnuam leh Reiek RD Block te tlawh niin, District attachment programme-ah Serchhip District leh Champhai District-te an tlawh a, Central leh State hmalakna chi hrang hrangte zir ho a ni.

Section Officer-te chuan ATI leh anmahni lo buaipuitu ten an lo dawnsawn danah an lawm hle tih an sawi a. Central leh State Initiative Programme hrang hrang an zirte chu hlawkthlak an tih thu sawiin Mizoram hmun pawimawh leh tourist hmun an tlawh theite chu lawmawm an tih thu an sawi a ni.