1584/2025-2026

Aizawl the 24th September, 2025 : Vawiin khan SCERT Auditorium-ah ni thum awh tur Post PARAKH Rashtriya Sarvekshan 2024 Dissemination and Training on Holistic Progress Card (HPC) chu hawn a ni. December 4, 2024 khan India ram pumah Ministry of Education hmalaknain Educational Achievement Survey lian tham, tun hma lama National Achievement Survey tih thin, tuna PARAKH Rashtriya Sarvekshan (PRS) 2024 tih tak chu neih a ni a, Mizoramah pawh school thlan bik 1,058 ah pawl 3, pawl 6 leh pawl 9 zirlai te tan neih a lo ni tawh a ni. He PRS 2024 hi NEP 2020-in a tumte zinga pakhat tihhlawhtlinna atana beihpui thlakna niin, rampum huapa zirlaite thiamna kawng hrang hrang tehna tura duan a ni.

He hawnna inkhawm hi Pi Caroline Zoramthangi, Director, SCERT chuan kaihruaiin, kalkhawmte lawmna thu a sawi a, zirna kawngah nasa lehzuala tan lak a tul thu a sawi. PRS 2024 Mizoram-a neih dan leh report kimchang chu Dr. Lalduhawmi Thomte, Joint Director, SCERT in a pe bawk a, kum danga National Achievement Survey (NAS) tih thin chu kum 2024 atang khan PARAKH Rashtriya Sarvekshan (PRS) tih a nih thu te, he survey-ah hian Foundational Stage, Preparatory Stage leh Middle Stage te tawp dawt chiah (Pawl 3, Pawl 6 leh Pawl 9) naupangten Mizo, English, The World Around Us, Science, Social Science leh Mathematics subject-ah zirlai 20,043, zirtirtu 3,272 leh school 952 an tel a. India ram pumpui nena khaikhin chuan Mizoram naupangte hian an ti tha lo hle a, a tlangpui thu in mipa aiin hmeichhe naupang an thiam zawk a, thingtlang aiin khawpui naupangin an ti tha in central school-ten state school-te aiin an ti tha zawk a ni.

Prof. Indrani Bhaduri, CEO and Head, PARAKH, NCERT chuan he programme hawnna inkhawmah hian video conference hmanga keynote address rawn sawiin, State leh UT zawng zawngte nena thawhhona tha tak avangin HPC chu stage hrang hranga hman chhinna district level a neih a nih tawh thu leh chumi mila siamthatna hna pawh thawh zawh a nih tawh thu a sawi. 

He inkhawmah hian Khuallian, Pu David Lalthantluanga, IAS, Secretary, School Education Department chuan, PRS 2024 report hi zirna kawnga hmasawnna lian tham tak thlen theihna tura bul tanna tha tak a nih thu a sawi a. Zirna kawnga kan dinhmun chiang tak min chhawpchhuahsak theitu niin, hmasawn kan mamawhna lai tilang thei tur assessment huapzo tak a ni a ti. Tin, he PRS 2024 hian zirlaite thiamna mai teh lovin, zirtirtuten naupang an zirtir dan leh an zirtirna kawnga an inbuatsaihna chungchang te, sikul hmun leh hma leh zirna hmanruate thlengin a enfiah dawn a, hei hi lawmawm a tih thu a sawi bawk. He PRS report hi district level leh village level a zirtirtu zawng zawngten ngaihvena, kan hniamna laite hria a thahnemngai taka hma la turin a chah a. Mizorama school naupangteah drop out rate a sang hle a, hei vang hian eizawnna tlak thiamna nei turin vocational skills kan ngaih pawimawh a tul a, zirlaite chu industry leh hnathawhna atana inbuatsaih turin 21^st Century skills hmanga kan thuam a pawimawh thu a sawi bawk. Pu David Lalthantluanga chuan he ni thum chhung awh training hian Mizoramah quality education a thlen ngei theih nan kalkhawmte duhsakna a hlan. 

He training rawn neihpui tur hian PARAKH, NCERT atangin Resource Person pahnih an lo tel a. Training hawnna inkhawmah hian Pi Elangbam Ashakiran Chanu, Senior Research Associate chuan ni thum chhunga training kalpui dan tur hrang hrangte a sawi fiah. Pi Zoramthangi Ralte, Joint Director, SCERT chuan he training hlawhtlinna tura hmalatu zawng zawngte leh kalkhawmte hnenah lawmthu a sawi.