1585/2025-2026

Lunglei, 2025 Mimkut thla ni 24: Vawiin khan Lunglei Municipal Council (LMC) hnuaia Task Force Committee on Krismas Bazar chu LMC Ward No. VI Councillor Pu R. Lalremsiama kaihhruaiin LMC BoC Meeting Hall-ah an ṭhu khawm a. Kumin 2025-a Krismas Bazar siam dan tur ruahmanna hrang hrang an sawi ho.

He ṭhut khawmah hian Task Force Committee member-te, department hrang hrang – Police, Traffic, P&E leh PHE ai awhte leh Lunglawn Local Council ai awhte an tel a. LMC Secretary Pi Zoramdini chuan Krismas Bazar siam chungchanga hma lakna report a pe a. Task Force Committee ṭhut khawm hmasaka Krismas Bazar siamna atan Lunglawn Mual dil ni se tih chu a ṭul anga bawhzui a nih thu leh Lunglawn Local Council aṭanga remtihna hmuh a nih tawh thu sawiin, a hmun pawh enfiah a, bazar ruangam tur ruahmanna pawh duan a nih tawh thu a sawi.

Bazar ruangam tur ruahmanna (blueprint) duan sa chu thlir ho niin, siam rem ngai lai rawtnate sawi ho a ni a. Bazar siamna atana department hrang hrang aṭanga puihna leh thlawpna mamawh dan te tar lan niin, eng (power supply) pe tura beisei an nih angin P&E lam chuan a ṭul anga an bawhzui theih tur thu an sawi a. Tui lak leh pek chungchangah PHED lam te’n a ṭul anga ruahmanna an siam theih tur thu sawiin, venhimna leh lirthei chet vel dan leh hun dan chungchangah Police lamin a ṭul anga ruahmanna an siam theih tur thu an sawi bawk a. Krismas bazar hunah hian lirthei chep lutuk tur pumpelh nan leh lirtheia ei zawngte tana remchang siam a nih theih nan mipuite mahni lirthei keng lo va, public transport hmang uar tura inzirtir ni se, tih a ni.

LMC Task Force Committee on Krismas Bazar ruahmanna anga Krismas Bazar siam tur hi December ni 15, 2025 aṭanga January ni 3, 2026 inkar chhung hawn ni se, tih a ni a. Dawr luah man chungchang leh mipuite tana ṭangkai thei ang bera Krismas Bazar kalpui a nih theih nana thil ṭul leh pawimawh hrang hrang sawi ho a ni bawk.