2038/2024-2025

Dated Hnahthial, the 12th September, 2024: Vawiin khan Hnahthial DC Meeting Hall-ah Hnahthial Addl. DC, Pu Zothanmawia Khiangte kaihhruaiin Central Sector Scheme hnuaia 10,000 FPO a hmalakna awm tawh leh thawhho dan tur relin District Level Monitoring Committee thutkhawmna neih a ni.

Thutkhawmnaah hian Hnahthiala Farmer Producers Organisation (FPO) dinhmun leh hmalaknate sawi hona neih niin tun dinhmunah hian Hnahthialah FPO hi pahnih (2) - Hnahthial FPO leh Darbilhi Tea Producer Cooperative Society Limited te an awm a. Small Farmers Agribusiness Consortium (SFAC) hnen atang Hnahthial FPO chungchang thlirhona neih niin anni hian he scheme hnuaia an thar chhuah nasat ber chu Dragon fruit, a bik takin Dragon fruit tui a nih thu tarlan a ni a. Hei bakah hian sawhthing leh Mizo chilli te pawh he scheme hnuaiah hian thar chhuah thin a ni bawk. SFAC implement na hnuaia he FPO scheme hi scheme dang nena convergence awm theih dan tur te he hunah hian sawi ho a ni bawk.

Darbilhi Tea Producer Cooperative Society Limited te implementating agency chu NABARD niin an thar chhuah hnem ber chu Darzo thingpuife a ni a. He thutkhawmnaah hian an hmalakna leh an hna ti thuanawptu, a bikin transportation cost leh electricity chungchangte ngaihthlak a ni a. Hnahthial District khaw chhungah an product chu tam zawka zawrh chhuah a nih theih dan tur te he hunah hian sawi ho a ni bawk.

10,000 FPO scheme hi Central Sector Scheme (sawrkar laipuiin funding 100% a tum) niin a thil tum ber chu India ram pumah kum 2025-a huan thlai neitu (farmers) intelkhawm, Farmer Producers Organisation (FPO) 10,000 din a ni. Hemi atan hian implementing agencies ah NABARD leh SFAC te chu thlan niin he scheme hnuaia hmalakna lian ber chu huan thlai neitute tan awlsam leh man man zawka an thil thar chhuahte market a hralhchhuahpui a ni.

He thutkhawmnaah hian District Agriculture Officer, Pu MS Dawngliana; District Horticulture Officer, Pu Lalthakima; Sr. Scientist KVK; DFDO leh Assistant DAO te an tel a ni.