2037/2024-2025

Champhai, 12th September 2024: HIV/AIDS leh mipat hmeichhiatna atanga natna inkaichhawn theih (STI) chungchang inzirtirna beihpui ‘Intensified IEC Campaign - India Fight Against HIV/AIDS & STI’  chu vawiin khan Vengthlang YMA Hall-ah Champhai District tan Bawrhsap Pu VL Remliana’n a hawng a. He hunah hian HIV/AIDS leh STI lam hawi Debate, Placard Design, Flash Mob dance, Photo Booth Design leh Stall Display hmangin zirlai naupangte tan intihsiakna buatsaih a ni.

Champhai Bawrhsap Pu VL Remliana chuan Kristianna in ziak leh chhiar thiamna min pe a, India rama ziak leh chhiar thiam tam ber pathumna kan ni tawh, a ti a, Chutiang a nih mek lai chuan HIV/AIDS kaihhnawihah erawh chuan a sang ber kan ni tih sawiin, hei hi kan pi leh pu te thiam loh vang ni lovin thalai ten nun kan uluk loh vang leh Pathian lam kan hawi tawk loh vang a ni, a ti. Zirlai kalkhawm te chu tun atanga nun uluk taka hmang turin khuallian hian a chah a, kan ram buaina ni mek HIV/AIDS lakah tuna thalaite an him tlat chuan he natna hi a rem tial tial dawn, a ti.  Pathian hre reng chunga nun kan uluk a, ruihhlo leh mipat hmeichhiatna kawnga kan fihlim tlat chuan kan ram hi kan ti dam leh thei tih kan hriat reng a tul a ni, a ti bawk.

He hun hi Dr PC Lalhmingliana, Sr. Chief Medical Officer chuan a kaihruai a. Pu Lalthlamuana Ralte, District ICTC Supervisor, Champhai hnen atangin report ngaihthlak a ni a. Pu T. Lalnunsanga, Vice President, SYMA hnen atangin HIV/AIDS leh STI chungchang thusawi ngaihthlak a ni bawk. Campaign puala intihsiakna hrang hrang buatsaiha lawmman dawngtute hnenah lawmman sem chhuah nghal a ni bawk a ni.