Nimin khan Lawngtlai Circuit House ah Central Young Lai Association hruaitute leh Lawngtlai District atanga MLA pahnih Pu C. Ngunlianchunga, Minister of State for Disaster Management and Rehabilitation leh Pu H. Zothangliana, Parliamentary Secretary for Higher and Technical Education te chuan inkawm hona an nei.

Pu C. Ngunlianchunga chuan kan hriat theuh angin Central YLA hma lakna in Total Band neih a ni a. Chumi a kan thil phut pahnih P&E Division puitling leh Lunglei to Lawngtlai kawng siamthat te hi sawrkarin a buaipui mek niin tunah chuan P&E Division puitling chu Chief Minister in min pawmpui ta a, Lunglei to Lawngtlai kawng pawh hna bul tan a ni ta bawk a ni. Amaherawh chu heng thil pahnihte hi vawi leh khatah awmtir nghal ngawt theih an ni lova, dan anga kal tir ve a tul dawn a, kawng chungchangah phei chuan khawl lian pui pui engemawzat lakluh hmabakin a awm mek a, chung hmanraw pawimawhte chu fel taka bun leh vek an ngai dawn bawk a; chungte chuan hun a la mamawh dawn; chu chu hriain dawhthei takin sawrkar i nghak ang u a ti.

World Bank kawng thar chungchanga a ngaihdan sawiin ramin hma a sawn zel dawn a, kawngpui thate hi hmun tinah laih ni se, mi tam zawkin chhawr thei ila tha a tih thu sawiin tuna a kalna tura ruahman chhinna pawh hian Laifate ram tho a paltlang dawn a, a tha viau zawka a hriat thu a sawi. Minister hian khuarel chhiatna lo thleng thut thei laka fel fai zawka inbuatsaihna nei turin sawrkarin hma a la mek a, tunah hian sipai lam ah leh tlawmngai pawlte atangin training mi engemawzat hnenah pek an ni tawh a ni. Chutiang ang training nei ve turin YLA chu inbuatsaih se tha a tih thu a sawi a, hma a lakpui theih tur thu a hrilh nghal bawk.

Parliamentary Secretary Pu H. Zothangliana pawhin thu sawiin tlawmngai pawlte hi ramin an mamawha, an tel lo chuan nunkhua a felhlel fo; amaherawh chu rilru zau tak pu chunga hmathlir neih a pawimawh thung a ni. Mizoramah Tlawmngaipawl then khat an pawl ngaihdan pela thil ti zauh thin te ngai theilo deuh mai thin kan awm fova, hei hi a pawi hle a ni. Ngaihtuahna zau tak pu chunga ram kal kan siam hi kan tu leh fate tan thlengin a pawimawh a ni a ti a. Lawngtlai District in hma a sawn zel theih nan mahni zawn theuvah theihtawp kan chhuah tlang zel dawn a ni a ti bawk.

He inkawm hona hi Central YLA President Pu Vanlianhrin chuan a kaihruaia, YLA in a thil beisei te sawrkarin a tih hlawhtlin sak avangin lawm thu a sawi a, theih tawpa tanpui thintu Minister Pu C. Ngunlianchunga leh Parliamentary Secretary Pu H Zothangliana te chungah lawmthu a sawi bawk a ni.

Minister leh Parliamentary Secretary hi Lawngtlai Bawrhsap Pu J. Hmingthanmawia leh LADC CEM Pu V. Zirsanga ten an tawiawm a, zanriah an kilho nghal a ni.