Chief Minister Pu Lal Thanhawla chuan nimin tlai khan Serchhip VC-III huam chhunga Lunglei zau-ah Horticulture Centre of Excellence a hawng. He Centre hi Horticulture Mission for North East and Himalayan Region (HMNEH) hnuaia din a ni a, Mizoramah a pahnihna niin, pakhatna chu Aizawl district chhunga Thiak khua (Hmuifang bul) ah din alo ni tawh a ni.

Chief Minister chuan he centre hawn tak hi kuthnathawktu loneimite tanpuitu tur leh a tul ang anga zirtirna petu tur a ni tiin, tanptuina dawngtu loneimi 60 thlan te chu in vannei hle a ni a ti a. Loneimite tana thil tha ber ber awmna a ni dawn a, zir tur tam tak awmna tur leh mite tana tha tur enge an thawh ang tihte ngaihtuahna centre a ni dawn a ni a ti a. Tanpuina dawng thlan chhuahte zingah NLUP tanpuina dawngte pawh an awm thu sawiin, Chief Minister chuan chung mite chu an vannei chungchuang hle a ni tiin, he centre hi NLUP tihlawhtling tura kawng dang pakhat a ni ve a ni a ti.

Chief Minister chuan hmasawnna hi hmasialna tellova rualkhai taka mitin, khawtin, leh kiltinah thleng se tih hi kan duh ber a ni a ti a. Hnam zahawm leh ropui ni tur hian ei leh barah leh sum leh paiah kan intodelh angai a ni tiin, Pu Hawla chuan Lal Isuan ‘heng mite ber chunga in tih hi ka chunga ti in ni’ a tihte hi leirem an raha khaw eng hmuh tir hmasak a tul a, chumi tur chuan a kawng kan hria a kan arkhawthim dai mai mai lo a ni a ti a. NLUP hian chutiang mite chu a zawnga, an khawbuzawlah theuh mi lian leh hausate tlawn ngai lova thlamuang taka eizawnna nghet an kalpui hi kan duh a ni a ti. Bul an tanna tura tanpuina pekte hi thlai tiak dik, sangha chi dik, vawkte hrisel leh a dang dang kan pekte chu a dik ngei chauh kan pe tur a ni a ti. Tuna Centre of Excellence atanga tanpuina dawngtute chu mite entawn tlaka thawk tura chahin, rinawmna, taimakna leh dikna nen tui taka thawk turin a chah bawk a ni.

Khualzahawm Horticulture Minister Pu P.C. Lalthanliana chuan kuthnathawk loneimiten hma an sawn theihna turin technology thar ber zel an hman theih nan sorkar chuan hma a la reng a ni a ti a. Serchhipin hetiang centre an neih theihna chhan chu bialtu Chief Minister in neih vang a ni a ti a. In mamawh tur te in hriat hma hauhin in bialtu hian a pe che u a, lawmnachang in hriat a pawimawh hle a ni a ti a. Kuthnathawktute hmakhua hi sorkarin a ngaihtuah reng a ni tiin, Mizoram hmasawnna tur hian dik chu dik ti ngam a, diklo chu diklo kan tih ngam a, tha chu tha, thalo chu thalo kan tih ngam a tul a ti.

Horticulture Centre of Excellence din nan hian a vaiin HMNEH atangin Rs. 500 lakhs sanction a ni a. hemi atang hian infrastructure siam nan Rs.275 lakhs dah a ni a, loneimite tan Rs.225 lakhs dah a ni bawk a ni. Loneimite tan hian mi pakhat zelah installmenta pein, Rs.3.75 lakhs dah a ni a, hei hi sum fai leh bungrua a pek an ni. Loneimi tin hian tui dah khawlna tanky, thlam (farm house) leh terrace an siam tur a ni a, thlai hi bean, sapthei leh balhla te chin tir an ni.

Inkhawm hi Horticulture Secretary Pu B.Lalhmingthanga’n a kaihruai a ni.