Vawiin Chapchar Kut chu ropui thei ang berin Mizoram hmun hrang hrangah hman a ni a, a hmanna ropui ber Aizawlah chuan Sipai Lammual-ah hman a ni a, Chief Minister Pu Lal Thanhawla chu Kut Pa niin Art & Culture Minister Pu R. Romawia chu Kut Thlengtu a ni. He hun chhim tura lokal Taipei Economics & Cultural Centre in India Representative Pu Chung Kwang Tien chu Khual Zahawm a ni.

Kut Pa chuan khawvel hmun hrang hranga Zofa awmte chu Chapchar Kut chibai a buk a. Zofate tan ni ropui tak, kan Kut ropui ber a ni a ti a.Kan hman danah ringtu ka nihna nena inmil zawnga kan kalpui a tha a, siam that ngai kan siam that chhoh zel a pawimawh takzet a ni a ti. He kutpui kan hmannaah min zawng chhuaktu ropuina anih zel theihna turin keimahni lampang theuh hi kan hman dan kawngah hlim hlawpnaa hmang ral mai mai lovin, hun lokal leh zelah Mizoten hnam nunphung zemawi kan neihte phochhuakin kan zemawi vawn nun zel nan awm se a duhawm hle a ni a ti a.

Chief Minister chuan thalaite chu nu leh pa te thuawih kawngah leh aia upate zah thiamna kawngah an tlahniam palh ang tih a hlauhthawn thu sawiin, entawn tlak loh entawna, kan nun zemawi tichhetu an ni palh ang tih a hlauh thu a sawi a. Kan tana tha tur entawntlak chu entawn a, kan pi leh pute atanga Zonun zemawi kan neihte, kan incheina te, kan nunphung leh culture te zahpui lova a vawng nungtu ni turin thalaite an pawimawh hle a ni a ti a. Hlawhtling taka kut hman theiha buatsaih ani chu a lawmawm hle a ni a ti.

Chief Minister chuan Kut hi hlimhlawp zawng leh a huau huau zawng chauh nilovin, hnamdang ramdang mite pawhin tel vena tlak, tel ve nuam an tih theih tur zawnga kan kalpui a tul a ni a ti a.Kumtina a changtlung zawka hman dan ngaihtuah chhoh zel a pawimawh hle a ni a ti a. Hnam nun siam that nana kalpui a, kan pi leh pu te ro tha kan pholanna ni tura hmang a, hnam dang ten min ngaihsanna ni thei tur zawng leh khualzinte hip thei zawnga kan buatsaih a tul a ni a ti.Chief Minister chuan Kut hi induhsaktawn tharna ni, inthian thatna ni, inchawimawi tawnna ni leh inzahtawnna niah hmang vek turin mitin a sawm a ni.

Kut Thlengtu Pu R. Romawia pawhi Chapchar Kut hmangtute chibai bukin he ni hlawhtlin theihna tura tha leh zung sengtute zawng zawng hnenah lawmthu a sawi a. Mizote kut ropui Chapchar Kut hi khawvel hriata chawi lar a nih deuh deuh theih nana tan la tlang tur leh Mizo hnam nunmawi lantirna ni atana hmang turin kalkhawmte a sawm a ni.

He huna thusawitu dang Central YMA President Pu Lalbiakzuala pawhin Chapchar Kut chu Zofate inpumkhatna ni, hmasawnna kawng zawhtirtu leh Mizo hnam nun ze mawi tlawmngaihna, aia upate zahthiamna leh rinawmna zir tharna hun atan hmang turin Kut hmangtute duhsakna a hlan a ni. Chapchar Kutah hian hmarchhak state zawng zawng atangin cultural troupe an lo tel kim hle a.

Ramdang Taiwan atangin Taipei Economics & Cultural Centre, New Delhi a Representative Pu Chang Kwang Tien leh a nupui Pi Yih Jiun Tien Chen, Pu Ho Chung Chang, Director, Science Division leh a nupui Pi Fe Tung Chang Tung leh Pu Hsin Chiang Hsu, Assistant Representative te an lo tel a. An ni bakah hian Japan atangte, UK, USA atangte in Kut chhim tur lokal an awm bawk a, India ram hmun hrang hrang atangin mi engemawzat an lo tel bawk a An ni bakah NEZCC, Dimapur atangin an hotu leh sipai hotu lal te pawh an tel bawk a ni.

Chapchar Kut 2015 lawmna ah hian Aizawl khawpui chhung YMA branch hrang hrangte'n Mizo hnam lam mawi tak tak Cheraw, Sarlamkai leh Chai an entir a, MHIP General Hqrs. aiawhin Pangpar lam leh MUP General Hqrs. aiawhin Mizo pipu zai an entir a. Zaipawl, Beat Group leh mal zai thiam tak tak ngaihthlak tur a awm bakah kum danga tih ngailoh a huhova violin tum (mass violin), Kut sa zawn leh pipute ral beih dan hmuhna tak thlir leh ngaihthlak tur a awm a. IMFA atangin traditional costume show, NEZCC atangin hmarchhak hnam hrang hrangte lam 'Choreographed costume show' thlir tur a awm bawk a ni.Kut lawmnaah hian lam chi hrang hrang, zai leh hmuhnuam tam tak entir a ni a. India hmarchhak state dang atanga cultural troupe lokalte pawhin hnam lam an entir hlawm bawk a ni.

Chapchar Kut denchhena buatsaih Vanapa Hall bathlara Photo Exhibition te, Assembly Annexe a Flower show-cum-sale te leh Lammuala Chapchar Kut Food Fest pawh neih chhunzawm zel a ni a. Heng Exhibition leh Fest te hi March ni 7 thleng neih a ni ang