Vawiin hian Lawngtlai a Central YLA Hall ah Hlukhla Chapchar Kut hlim taka hman a ni a, Pu C. Ngunlianchunga, Minister of State for AH & Vety chu kut Pa niin Lawngtlai Bawrhsap Pu J. Hmingthanmawia chu kut thlengtu a ni.

Hlukhla Chapchar Kut tan nan kal khawmten “Ro min rel sak ang che” tih hla an sa hova, chumi hnuah Major Lalrinngheta, CO chuan Pathian hnena inhlanna a neih zawhin kut hmanna Programme chi hrang hrangte neih chhunzawm a ni.

Kut Pa, Pu C. Ngunlianchunga chuan, mahni hnam zia hnawla hnam dangte zia entawn thin hnam chu a ral thin. Mi dangte tihdan entawn in kan hnam hi kan tiral dawn nge, kan ze dik tak kan chawinung zelin kan dingchhuak zawk dawn? Tih hi vawiina Mizoram mipuiten kan chhan tur zawhna pawimawh tak chu a ni a ti.

Kut thlengtu Pu J. Hmingthanmawia pawhin thu sawiin Kut hmang tura kal khawm mipuite chungah lawmthu a sawi a, hlim leh nuam taka Hlukhla Chapchar Kut hmang theuh turin duhsakna a hlan a ni.

He mi hnu hian Lawngtlai khawpui chhunga YLA branch thlan chhuahten Chawnglaizawn, Sarlamkai leh Chheihlamte an entir a, LADC Art and Culture Department Cultural Troupe ten Pawhlohtlawh lam an entir bakah, Mizoram Upa Pawl, Lawngtlai Sub Headsquaters ten Hlado chham in mipuite an awi bawk.

Heng lam chi hrang hrang entir kar lakah hian zaithiam hrang hrangten mipuite zaiin an awi a, Hlukhla Chapchar Kut Miss thlanna neih a ni bawk. Hemi hnu hian Hlukhla Chapchar Kut puala buatsaih ei leh in tuihnai tak an ei ho a ni.